Tunhnaia Vairengte chhehvel mimal kudam-a police-ten dan loa tawlhruk kuhva rah chheprelh an hmuhchhuah, a hnua bo then ta teuh zinga thenkhat chu police-ten an hmu let leh.
Kumin June 24 & 25 khan SDO (Civil) Vairengte, police leh Kuhva Chingtu Society-ten Kolasib bawrhsap thupek bawhzuiin, Vairengte leh Phaisen chhehvela Burma kuhva ro chhekkhawl a awm leh awm loh kudam hrang hrang an enfiahnaah kudam chhunga dah kuhva bag 9000 chuang chu hmuchhuakin an chhinchhiah a, a hnu ah heng kuhva rah hi kudam atangin a bo a, bag 5000 chuang a bo nia sawi a ni.
Heng kuhva rah bo hi police-ten an chhuizui a, July 7 – Pathianni zing dar 8.30 vel khan 407 truck MZ 05 3887, Burma kuhva ro bag 75 phur, Phaisen khawchhunga biru chu hmuhchhuakin, he truck hi Phaisen Police Checkgate-a lak a ni a, a khalhtu hi R Lalnunpuia (46) Chhimveng Phaisen a ni. Phaisen Venglaia K Sawma building-ah dan loa lakluh Burma kuhva ro bag 145 hmuhchhuah a ni bawk a, kuhva dahna hi police-ten an ‘seal’ nghal a ni. He kuhva hi a neitu nia hriat chu Rahul Majumder (24), Silchar a ni a, a thurualpui nia hriat chu Lalchhuanliana (43), Ruantlang Champhai a ni.
Kuhva bo thenkhat hmu let
