Tunhma chuan vai ram atangin kuhva rah te, kuhva hnah te, chinai te kan chawlut a, a mipui mimirin kuhva kan ei nasa a; tun thlengin kan la ei nasa. Kum 20 chuang a ni ve ta, kan ramah kuhva chin kan intihhmuh a, mahse a dehral dan leh a sawngbawl dan kan la hre lutuk lo. Kuhva par laiin Vaihovin a hmunah an rawn en a, chuti zah chuan ka lei ang, tiin a rah hmain an rawn hauh lawk a. Chutiang chu kan kuhva tihral dan tam zawk a ni. Mahni rama kuhva tharchhuah, mahni rama sawngbawl kan la thiam lo, thiam lo pawh ni lovin, a nachang kan hre lo te pawh a tih theih ang.
Kuhva rah hlawkzia chu, ramri kaltlanga dan kalha ramdang kuhva a lo luh chur chur atang khan kan hre lehzual, thildang hlawk deuhte pawh an lo phur tel a ni maithei; mahse, a kuhva hrim hrim an buaipui nasat danah khan a market chu a chhe lo tih a lang reng mai. Mizoram kuhva chingtute a nghawng dan pawh kan hriat hnu.
Kum thum/li vel chhung dan kalh kuhva kan buaipui khan, Mizoramah Kuhvaa Hartharna a thlentir deuh a nih a rinawm a, tunhmaa sawi rik feih feih thin, “mahni tharchhuah, mahni ngeia sawngbawl a, man man zawka tihral dan ngaihtuah” tih chu hei, kuhva chingtute leh sawrkar lam hmalaknain kan hmu chho tan mek a, hmasawnna rahbi thar pakhat kan dawh leh mek a tih theih awm e.
Vaihovin kan kuhva par an rawn en thin a, tunah chuan keimahni ngeiin kan kuhva par te kan en ve tawh dawn tihna a ni awm e. State pawn lam miten, tha leh zung, sum leh pai, hun tam tak sengin kan kuhva huan an rawn pan a, an rawn khar a, a lawh hunah an lo a, a phurh chhuahna (transportation cost) paih vek hnuah pawh, hlawkna tam tak an la tel thei a nih chuan, a kuhva huan neitu keimahni hian kan buaipui theih phawt chuan a let deuhthawin kan hlawkpui thei dawn tihna a ni.
Tun hnaiah Hachhek Bial Kuhva Chingtu Pawl (HBKCP) ten, anhmahni sensoa Guwahati leh Meghalaya-a Kuhva hralhna leh sawngbawl dante a hmuna zirchianna an zuk nei a, Kuhva Tour an nei te kha, a lawmawm hle, rah tha tak chhuah mawlh teh se.
Kuhva ang bawk hian, state dang atanga kan chawkluh, keimahni ram leilung ngeia kan mamawh ang tharchhuah ve theih rengte hi, hartharna i chanpui zel teh ang u.
Kuhva Harhtharna
