Masena Raltek
Myanmar Kuhva ro leh Tualchhunga kan thar Kuhva chungchangah hian thil awmzia hre mumal lo thahnem tak kan awm nia a lan avangin, Media ka nihna angin, a hmunhma leh harsatna an tawh dan ka lo cover ve nual tawh atanga Kuthnathawktu ten harsatna an tawh dan ka hmuh dan kan ziak ve teh ang.
1. Kan kuhva hring tharchhuah hi Vai hovin an lei a, chu chu an kheh a, an ti rova, Quality hrang hrangah then hrangin India lairil lamah kan thenawm vai ho hian an thawn thla leh thin, a rah tha deuh chu Polypot a kui atan te, Scope atan te, Local market-ah a hringa hralh atan te an ti ve bawk.
2. Hetianga Kuhva process tur hian kan thenawm vai sumdawng ho hian kan kuhva thar te hi rawn leiin, a tlangpuiin sumdawng lian te tan sumdawng tenau zawk ten an rawn buaipui thin.
3. Heng sumdawngte hian an eizawnna hi an master hle vek a, Kuhva buaipui tur an neih tam leh an hlawk dawn tih hriain, Kuhva huan neitu a tam thei ang ber nen relation tha tak siamin, an hauhlawk theih dan ang angin a kum leh atan an hauh lawk thin a, tunhnuah phei chuan a par dan atanga enin leh an huan an lo hriatchian tawh dan atangin a thar zat tur an chhuta, a leina tur pawisa pawh a par lai atangin a huan neitu te an pe lawk hial thin.
4. Myanmar Kuhva ro a rawn luh chinah, a tir lamah chuan harsatna a awm lo, Assam sorkar in Myanmar Kuhva ro a dan ve chinah, Mizoram atanga kal vek a nih avangin Mizo te thar Kuhva hring pawhin harsatna a tawk ve nghal.
5. Mizote tharchhuah Kuhva leitute pawhin Assam lamah harsatna an tawk nasa tial tial a, mi thenkhat, Kuhva ro hliah nana kuhva hring lo phur tel tawk an awm thin bawk nen, a chang chuan Kuhva thunna bag langtlang thei NET hman tur an ti a, a changin chung pawh chu a lo checktu te lakah a him chuang lova, pawisa tam tak tak chawi tir thin an ni.
6. Kum a lo vei zela, Myanmar Kuhva ro a tam vangin demand a tlem ta nge ni, kan Kuhva thar leitu ten harsatna an tawh vang nge ni, Kuhva lei tura rawn hauhlawka pawisa thlenga pe lawk thin khan, tunah chuan kuhva leitu tur an rawn kal ta mang lova, Kuthnathawktu ten an kuhva hralhna ah harsatna an tawk ta mek ani.
7. Hetianga Kuhva sumdawnna hi, sumdawnna dang ang bawkin a inthlunzawmna chu sumdawng liante an ni lo thei lova, Kuhva theuh theuh, Myanmar Kuhva ro ang bawkin, kan tharchhuah pawh hi an process hnua a thlenkhawmna hmunah chuan Kuhva ro ani ve tho niin a langa, chu chuan India lairil lama Kuhva demand sang hle thin kha a zuk supply te ani thei bawk. chuti lo ni ta se, Kuhva demand tlahniamin Mizo te tharchhuah Kuhva hralhna hi a nghawng ani mai lo maw.
Engpawh ni se, kan ram chungah hian kan ni tin mamawh dan lova lo lutte hi awm bawk mah se, heng hi mi tin mamawh a nih avangin, dan ni lovin keima ngaihdan ah chuan a hriatthiamawm ve thei thoin ka hria, amawherawhchu, kan mamawh ni lo, dan pawhin a khap reng, mihring tan pawha thil tha lo zawk ni bawk si hi, Sum leh pai uma hausak tum thenkhat te hmalakna a nih avangin ka rilru chuan a hrethiam thei lova, mi thenkhatin an lo hausakpui thur thur pawh ka thik hek lo. a pawimawh ka tih tak zawk chu,
‘KUTHNATHAWKTU TEN AN THARCHHUAH HRALHNA AN NEIH THEIH NAN’ TI A SORKAR THLENGA KAN BUAI LAI A, A HRALHNA AWMSA RENGIN HARSATNA A TAWK HI A PAWI HLE ANI.