Hachhek tlang dunga kuhva huan neite tan kuhva hralhna tur tihfel a hun daih tawh a, mahse a leitu tur mazon an la lang lo. An nghak tawp mai a, kuhva huan neite hi an mangang tawh hle tih thu dawn a ni.
“Farmer-te kan mangang a, tunah hian chhungkaw khawsak a nghawng tawh a. Tihian kan nghak ve tawp mai a ni,” Hachhek Bial Kuhva Chingtu Pawl general secretary Lalvenhima Ralte chuan a ti.
An sawi danin, May thla velah kuhva hi a par tan a, a par lai atangin mazon-te’n a hmuhah enin an hauh thin. May leh June velah chuan an hauh fel tawh thin a, kumin erawh, August a liam tawh a, mazon an la lang lo.
May leh June vela an hauh hian a hauhtute hian a hauh nan pawisa an pe lawk thin a, kuminah chutianga pawisa dawn lawk an neih loh avangin kuhva huan neite a nghawng a, sum lengvak pawh a tlem phah an ti.
Tun hnaiah mazon lian ni lo, kuhva lei thin thenkhat chuan kuhva huan hi an en a, tlawm tea indawn te pawh an awm. Hachhek Bial Kuhva Chingtu Pawl hruaitute sawi danin, kum dangah a huana an hauh thin laiin tun hnaia huan entute hi chuan a huanin an hauh ngam lo a, a bag-in an hauh a, chu pawh a rate a hniam. Bag khat Rs 1000 te’n an hauh a, kum danga an hralhna rate atanga chhut chuan bag khat hi Rs 2000 vel man tur a ni ang an ti.
Kuhva lei thinte hian foreign atanga kuhva lakluhin a nghawng a, Mizoram kuhva thar an lei tha ngam lo tih chu an thu hriat a nih avangin Hachhek Bial Kuhva Chingtu Pawl te hi June ni 5 atang khan an pawl dinna huam chhungah foreign kuhva dan tumin chhun zan zawmin an duty a, kar hmasa lam atang khan an tawp rih.
An pawl hruaitute chuan kawng chhiat vanga chawl rih an nih thu an sawi a, tunlaiin kawng a chhia a, lirthei dang pawhin harsatna an tawh lai hian kuhva phur lirtheite pawh an tlan hlei thei lo nia an hriat avangin an chawl rih tih an sawi.
Hachhek tlang dung hi kuhva chinna hmunpui a ni tawh a, a hma chuan an kuhva leitute hian Kanhmun paltlangin Karimganj lamah an phur chhuak thin. Kum li vel liam ta atang khan Bairabi kaltlangin Hailakandi district lamah phur chhuah a ni ta thung. He kawng hi a kual zawk a, hei pawh hi foreign kuhva vang leh Karimganj lama an politician-te’n chumi remchang chuha harsatna an lo siam vangah an ngai.
Kuhva huan neite’n mazon la nghak chhuak lo
