Kuhva rah mansa lilam

Kuhva rah mansa lilam
Tunhnaia Kolasib district Thingdawl Polytechnic building-a dan loa tawlh kuhva rah an man sa lilam chu a tirah cheng nuai 400 chuang hua chhut niin, lilamnaah hian cheng nuai 14.63 a hralh a ni.
Ningani khan MNF Thalai chuan Thingdawl Polytechnic building-a dan loa kuhva ro man sa dahkhawm chu enfiah an tum a. He hmun atanga kuhva rah ro truck trip hnih phurhchhuah tum chu senghawi an tum a ni.
Kolasib SP David H Lalthangliana leh SDO (Sadar) H Lalramliana ten lo dawngsawngin a hmuna an inbiak hnu ah MNF Thalai hruaitute phut angin, kuhva rah dahkhawm hi an enfiah bakah district bawrhsap hoa thutkhawm a ni.
MNF Thalai-in kuhva man tihral chungchanga zawhna an neihte bawrhsap Robert C Lalhmangaiha’n a hrilhfiah a. Kuhva ro tawlh khapna thu tihchhuah hmanga man a nih dan, District Court-in district magistrate hnenah kuhva man sa tiral tura thuneihna a pek anga tihral a nih thu, tihralna tura kalphung tha bera a hriat anga hma a lak dan a sawifiah a ni.
Hei bakah hian Vairengte kudam atanga kuhva rah bag bo chungchanga hma lak a nih dan leh thil awm dan, deputy magistrate prohibitory order tihchhuah hma avanga hma lak chhunzawm a nih loh dan pawh SP-in a sawifiah bawk
MNF Thalai hruaituten an dil angin Thingdawl Polytechnic-a kuhva ro chungchanga court thurel, district magistrate-in tiral tura hma a lak dan leh auction a nihnaa lehkha pawimawh chu district magistrate hian a hlan a ni.
MNF Thalai Hqrs. thuchhuak chuan, Thingdawl Polytechnic building-a dan loa kuhva ro man sa dahkhawmna an tlawhnaah heng truck hi sawrkar venhimna in an chhuak tih an hriatin an dem tih an sawi a. Kuhva ro man sa sawrkarin a enkawl dan leh a hralhchhawn danah thil dik lo a tam hle tih an hmuh belh zel niin a sawi.
‘Cheng nuai 400 chuang man ni si Rs. 14,63,000 chauha Vai smuggler-te hnena a hralh hian cheng nuai zabi eiru an awm tih a tichiang. Sawrkarin hetiang thil a auction hrim hrim hi a mak a, reserved price (chhan hniam theihna ber) pawh siam loa sawrkar duhsak zawng lei tir an nih dan phei hi chu mak kan ti,’ a ti.
Ram pumin dan kalha Burma kuhva ro a buaipui laiin, April 23 khan Tuirini bula Burma kuhva ro truck lian trip thum chu ualau takin khawchhak lam atangin an rawn la phur thla zel tih sawiin, Mizoram chu smuggler-te zalenna hmunah ZPM sawrkarin a siam mek tih a sawi a ni.