Champhai Police Special Task Force chuan July 7 zan khan Aizawl atanga Champhai lam pan Bolero Maxx AS-01 TC 8784 chu rinhlelh thilah an lo tiding a. Uluk taka lirthei an dapnaah Manta Ray/ Mobula samkhuih (gill plates) ro nia hriat, ip pakuaa khung, kg 210 vela rit thuhruk an hmu chhuak.
Heng an thil man hi international black market-a an hralhna thin ang chuan cheng vaibelchhe 2.30 hu vel nia chhut a ni a, Mizoramah hetiang thil tum khata an man tam ber tum nia hriat a ni.
Lirthei khalhtu Rajiv Hussein Laskar (26) leh ami phurh Jinuk Uddin Laskar (30), Silchar Assam chu man an ni a. An thil man hi Wildlife Laws hnuaia humhalh tlat an nih avangin Divisional Forest Officer Champhai Forest Division hnenah dan anga hma lak zui tura hlan an ni.
July 5 khan Champhai Khankawn Police Check Gate-a duty-ten an tih dan pangngaiin lirthei kal vel an endiknaah, tank lorry AS-07 C 5431) atangin Myanmar atanga dan loa lakluh kuhva ro (dry areca nuts) kg 2960 a rit, cheng nuai 10.36 hu vel man nia chhut an man. He thil phurhna tur hian lirthei khalhtu hian lehkha pawimawh (valid documents) engmah a neih loh avangin, dan loa lakluh nia ngaih a ni. Lirthei leh an kuhva man hi Customs Preventive Force Champhai hnenah dan anga hma an lak zui theihnan an hlan chhawng a ni.
Kuhva ro leh Manta Ray man
