Ram pawn atanga kuhva rah tawlhluh an khuahkhirh hnu ah tualchhunga kuhva chingtuten an hralh tha sawt tih Home minister K Sapdanga chuan a sawi.
huthar thehdarhtute zawhna chhangin Home minister chuan, an sawrkar tirh thlengin ram pawn kuhva tawlhruk a nasat avangin tualchhunga kuhva chingtuten harsatna an tawh phah a. Ruihhlo tawlhruk an ven rualin an veng tel ve a, khawchhak lam ramri hrul khuaah dan loa heng thil tawlhruk veng turin police an tir chho a, heng khuaa khawtlang hruaitute pawhin sawrkar hmalakna hi an lo thlawp lo thei loa, khawchhung mite inhlawhna erawh a tawp avangin hrehawm ti ru tak chungin sawrkar an thawhpui tih a sawi.
“Heti chung hian khawi khawiah emaw chuan in man tur a awm leh zauh thin a, khawl hmanga kawng lai chawpa rawn luhpui an awm thin. An thlen thui hma in kan man leh thei hlauh thin zawk a ni,” a ti.
Hetianga an ven hnu hian kuhva tawlhruk hi a tlahniam a, tualchhunga kuhva chingtuten a hralhna lama harsatna an tawh phah kha a ziaawm ta hle tih a sawi a ni.
Ramri buai chinfel tum chungchangah Assam sawrkar chu dawr an buaithlak hle tih Home minister hian a sawi. ZPM sawrkar hnua ramri chungchanga an inbiak hmasak ber chu ‘Goodwill Mission’ an ti a, Aizawla neih a nih angin sawrkar chuan meeting minute pawh Assam sawrkar hi a thawn nghal a. A dawt lehah Guwahati-a inbe tura an tih chu an ni lam hi an reh vang vang a, Mizoram sawrkarin tum thum a nawr hnu ah inbiak hi an rawn tihlawhtling a, meeting minute an rawn peih hleithei leh lo reng tih a sawi.
“Minute an rawn thawn hnu ah Aizawla inbiak leh kan rawt a, tum thum tho kan hrilh nawn hnu ah pawh an la reh rih,” a ti.
Inbiaknaa an tum dan a inang lo tih K Sapdanga hian sawiin, “Mizoram chuan ramri chinfel thuai a, ramri tak tak physical-a neih kan duh. Assam sawrkar lam chuan ramria buai a awm loh hi an duhtawk viau niin a lang,” a ti.
Kuhva tawlhruk kan khuahkhirh hnuah tualchhung kuhva hralh tha: – Home minister
