Kuki nuhovin sorkar survey team dang, boruak tang thar
Manipur-ah chi leh chi inkara buaina chhuak avanga mahni in leh lo tlanchhiatsana awm mek, internally displaced person (IDP)-te an awmna pangngaia kirtir leh tura hmalaknaa sorkarin survey nei tura a tirhte Kuki nuhovin an lo dan hnuah boruak a tang thar leh.
Thawhtanni khan Imphal West district-a Keingam Chingmang-ah Sekmai sub-deputy collector (SDC) kaihhruai survey team hi Kuki hmeichhiaten an lo dang tih thuneituten an sawi.
Thuneitute chuan survey hi state sorkarin March 31 hmaa IDP 10,000 chuangte an awmna hmun ngaia kirtir leh tuma hma a lakna pakhat a ni tih an sawi.
SDC kaihhruai team hi Khurkhul, Imphal West-a relief camp-a awm thenkhatin an zui a, hei hi Kuki-Zo nuhovin lo dangin survey neih hi an tibuai a. Team hian a hmain Khurkhul relief camp hi IDP-te nihna leh an harsatna hre chiang turin an tlawh hmasa a ni.
Thuneitute chuan SDC office-a thawk leh anmahni zuitu IDP thenkhat chu Kuki-Zo nuho hian an lo hreng a, a hnuah an chhuah leh tih an sawi a. Leimakhong-a venhim hna thawktu dahte pawh hriattir nghal niin survey team hi him takin an hruai let thei a ni.
He thil thlen hnuah hian Keingam Chingmang, Imphal West-a survey kalpui mek pawh boruak tang tak a awm zui avangin tihtawp lailawk a ni tih an sawi.
Manipur-a home department chuan sorkar laipui rorelna hnuaia awm mek state sorkar hian February 13, 2025 atanga hma an lakah January 29 thleng khan hnam hnih inkara buaina chhuak avanga tlanchhia chhungkaw 3,700 chuang, mi 16,500 vel chu an awmna pangngaiah hawtir leh tawh niin an sawi.
May 3, 2023 atanga Manipur-a court-in Scheduled Tribe-a Meitei tel tura thu a tihtluk duh lohna nghawng avangin Kuki-Zo leh Meitei inkarah buaina a chhuak a. State pumah buaiin mi sang telin an in leh loan tlanchhiatsan a, thenkhat chu ramhnuaiah awmin thenkhat chuan thenawm state an pan hlawm a. Relief camp-ah mi tam tak an la awm bawk.
Hnam hnih intihbuaina avang hian mi 260 chuang thi an awm tawh a, mi 60,000 chuang tlanchhia an awm a ni.
Kuki nuhovin sorkar survey team dang, boruak tang thar
