Kuki-ten tiam chin awm lova inkhar an kalpui titawp

Kuki-ten tiam chin awm lova inkhar an kalpui titawp
Manipur-a Kuki pawl intelkhawm chuan March 8 atanga an chenna, tlangram huam china tiam chin awm lova inkhar an kalpui chu an titawp ta tih an puang.
Kuki-te hian sorkar laipuiin an state-a inkalpawhna zawng zawng hawng tura thu a pek chu duh lovin an duh lohna an lantirnaah venhim hna thawktute nen an intibuai a, hemi hnuah hian inkhar hi an kalpui a ni.
Kuki-Zo Council (KZC) chuan Ningania thuchhuah an siamah sorkar laipuiin Manipur-a chengte inkalpawh vek thei tura a ti chu an la duh lo reng tih an sawi a. Heti chung hian an chenna hmuna inkhar an kalpui chu an titawp tih an tar lang.
An inkhar hian Manipur hmun dang a tibuai ve lo niin thuneituten an sawi.
“… Kuki-Zo Council-in tiam chin awm lova inkhar a kalpui chu March 13, 2025 zan dar 07.30 atangin kan titawp a, hemi tur hian uluk taka thil ngaihtuah a ni. Hetih rual hian home ministry-in inkalpawh theih a ti chu Kuki-Zo mipuite chuan kan la duh lo reng a ni,” tiin KZC Information Secretary Khaikhohauh Gangte chuan thu a chhuah a ni.
Sorkar laipuiin Manipur-a kawngpui zawng zawng hawn tur a tih ni, March 8 khan Kangpokpi district-a a duh lohna lantirnaah mi pakhat a thi a, mi dang 16-in hliam an tuar bawk a. Venhim hna thawktute zinga mi 27-in hliam an tuar ve bakah lirthei pahnih hal a ni tih police chuan an sawi.
“Kuki-Zo mipuite tana an chanvo pek a nih hma chuan zalen taka inkalpawh theih tih hi kan do zel dawn a… Thuneitute pawh kan thil phutte min ngaihtuahsak turin kan bia a, muanna a awm nan leh Kuki-Zo tana dikna leh himna a awm theih nan kan thawk zel ang,” tiin KZC hian thu an chhuah.
Manipur hi President’s Rule-a awm mek niin Governor Ajay Kumar Bhalla-a’n ralthuam ruk leh dan lova kawlte hlan hun tur a tiam chu kar hmasa khan a zo tawh a. Venhim hna thawktute chuan ralthuam nena che chhuaka kawngpui dan tumte chu a bei let zel.
KZC hian zalena inpawh theih hi eng angin nge ‘an dodal’ zel dawn tih an puang tel lo.
Manipur-ah hian phaizawla chengte hi Meitei niin tlangrama hnam hrang hrang chengte hi Kuki an ni a, hnam hnih hi May, 2023 atang khan ram neitu nihna leh politics thil avangin nasa takin an inbei a. Mi 250 chuang thi tawhin mi 50,000 velin an in leh lo an chhuahsan tawh bawk.
Kuki hruaitute leh an hnuaia mipui pawl hrang hrangte chuan inkalpawhna hawn a nih hma hian inawpna hran pe turin sorkar laipui hi an phut.
Meitei pawlte erawh chuan in leh lo chhuahsana relief camp-a awmte chu Kuki-ten an haw tur an tibuai thin niin an sawi a, national highways kal a harsa niin an sawi bawk a. Kawng hawn a nih chuan muanna atana inbiakna pawh a kaltluang thei zawk dawn niin an sawi bawk.