Kuki-Zoten inthlan hmaa an thil phut tihhlawhtlin phut
MLA pasarih telin, Manipur-a Kuki-Zo hnam pawl, Kuki-Zo Council (KZC) leh thuneitte nena inbei lo tura inremna, suspension of operation (SoO) siam mek hel pawlte chuan an state assembly inthlan hma ngeia an thil phutte politic hmanga chin fel an phut.
Manipur assembly hi Chief Minister N Biren Singh-a a bân hnua February, 2025 atang khan sorkar chu thiah niin President’s Rule hnuaiah an awm mek a. Tuna assembly hian March, 2027 thleng hun an la nei.
Kuki-Zo hnamin Thawhlehnia Guwahati, Assam-a thutkhawm an neihah politic-a chin fel theih chi thil panga an phut a, heng zingah hian rorel khawl nei union territory-a siam an phut tel.
He an thil phut hi May, 2023-a Kuki-Zo leh Meitei hnam inkara buaina a chhuah hnu lawkah pawh khan an duh thu an lo sawi tawh kha a ni.
“Sorkar laipui hian rorel khawl hran nei union territory, dan hmanga kan ram neitu nihna kan humhimna tur nen a siam thuai kan phut,” tiin an thutkhawm zawha thuchhuah an siamah an tar lang.
“Kan thil phut hi danpui hnuaiah politic hmangin tuna legislative assembly hun a ral hma ngeia tihfel ngei kan phut a ni,” an ti bawk.
Kuki-Zo hnam hian President’s Rule hlih a nih hnua sorkar awm leh turin an tihsak hmasak tura an duh an tar lang bawk a. “Sorkar thar hian ziakin danpui hnuaia UT kan neihna tur an dah ngei tur a ni a. An intiamna hian hun tiam neiin, tuna assembly hun chhung (kum 2027 tir thla thum) chhunga tihhlawhtlin turin ziah kan phut bawk,” an ti.
Politic hmanga an thil phut tih theih ti tura state sorkar leh sorkar laipui intiamna a awm loh chuan Kuki-Zo pawl leh MLA-te chu Manipur-a thlan chhuah sorkar siamna turah an tel ve dawn lo tih an sawi bawk.
Manipur hi May, 2023 atang khan Imphal Valley-a cheng, Meitei leh tlangram district-a cheng, Kuki-Zo inkara buainain a tuam mek a. Tharum thawhna thlengah mi 260 chuang thiin mi 60,000 dawn chenna in chhuahsana tlanchhia an awm phah.
Kuki-Zoten inthlan hmaa an thil phut tihhlawhtlin phut
