ZPM sawrkar hnuaiah kum 10 chhungin chhungkaw tam tak an dinchhuah ngei a ring tih Agriculture minister PC Vanlalruata chuan a sawi.
Thawhtanni ZPM office-a inkhawmah an party hruaitu PC Vanlalruata hian Mizoram damna turin damdawi an zuar a, mipuiin an damdawi zawrh chu tha tiin sawrkarna an pe tih a sawi. Kuthnathawktuten link road an mamawh thu an sawi thin a, tih hlawhtlin sak ngei an tum a, ZPM sawrkarah kum 10 chhungin chhungkaw tam tak an ding chhuak ngeiin a ring tih a sawi bawk.
“Kum 10 hnuah chuan Mizoram hian hmel thar a hmuh ngei ka beisei a. Hand holding policy hi Mizoram tan damna tur a nih ka beisei,” a ti.
Hand Holding Policy tum ber chu hmasawnna tluantling leh nghet a ni, tiin, “Kan ngaihpawimawh ber pakhat chu thlai thar hralhna market a ni. Sawrkar kal tawhten helam hi an ngaihthah em em a, keini chuan auhla berah kan hmang a, tihlawhtling turin a takin hma kan la mek,” minister hian a ti.
An sawrkar tirhin Aizawl khawpui chhung hmun 4-ah thlai thar hralhna tur wholesale market an sa dawn tih a sawi chu chak takin an bawhzui a, tunah hmun hniha wholesale market sakna tur sum cheng veibelchhe 10 an dawng tawh a, a hmunhma tur hi Sihphir leh Melthumah an en tawh tih a sawi a ni.
“Bana Kaih Policy-ah dahkham ngai loin cheng nuai 50 thleng bank loan a lak theih dawn bakah Chief Minister Package cheng nuai khat a lak theih dawn. He policy-ah hian hlawhtling ngei turte chauh sawrkarin a ngaipawimawh dawn a, a thlawna sem ang kha a ni ve lo,” PC Vanlalruata hian a ti bawk.
Kum 10 chhungin chhungkaw tam tak an dinchhuah ka ring – PC Vanlalruata
