Kum 2007 atanga bul tan tawh, Mizorama hotel management zirna – State Institute of Hotel Management (SIHM) Bung Bangla Aizawl ami chu tun thlenga puitlin a la nih loh avangin Public Accounts Committee (PAC) chuan a lawm loh thu Mizoram Legislative Assembly House a hrilh.
August 23-a Legislative Assembly Session-ah PAC chuan “Twelfth Report on the Report of Comptroller & Auditor General of India for the Year 2018-19 Relating to Tourism Department” tih House-ah a pharh a. He report-ah hian SIHM dinna tura hma lak tawh dan chhuina tarlan a ni. Mizoram tourism chawikanna hmanrua atana thalaite chherchhuahna tur zirna in pawimawh tak hetianga thamral leh mai thei dinhmuna a ding hi Committee chu a lawm lo takzet a ni, tiin report-ah hian tarlan a ni.
SIHM atan hian sawrkar laipui Ministry of Tourism chuan kum 2007 khan cheng vaibelchhe 10 (nuai 1000) a sanction a; heta tanga cheng nuai 200 chu construction zawh a nih hnu leh, a thawktu tur (post creation) siamfel a nih a, institution kalpui theih tura peih a nih hnuah
ISHM hi hlawhtling ta se –
* Zirlai 100 tan hotel management degree course a zir theih ang
* Zirlai 150 tan Tourism Diploma Course a zir theih ang.
* National Council for Hotel Management and Catering Technology (NCHMCT) kaltlangin All India Joint Entrance Examination hnuaiah admission kalpui a ni ang a, Mizoram state-in 20% a nei ang.
* ISHM-ah hian mipa 42 leh hmeichhia 20 awm theihna boys & girls hostel a awm bawk ang.
chauh pek chhuah tura tih a ni.
Institution sak hna hi Mizoram PWD-in a thawk a, kum hnih chhunga zawh tura tih a nih laiin, kum 7 hnu September 2013 khan zawh a ni a, Tourism department hnenah May 2015 khan hlan a ni. Institution hian administrative & academic block, boys hostel block leh girls hostel block a nei.
SIHM enkawlna tura post creation chungchangah kum 2013 khan Tourism department chuan post 22 a rawt a. DP&AR-in post 19 nise, a ti ve thung. Kum 2019 khan ngaihtuah yhat leh niin post 32 ruahman a ni a. Hetih chhung hian building hi luah loha a awm rei avangin a hmelhem nasa hman hle a. Building chhia thawmthat nan hian cheng nuai 201.7 sen a ngai dawn niin PWD-in a chhut a, mahse hei hi sawrkar chuan a tihsak thei lo. Tunah hian block thenkhat chu Shivalaya Construction Company Pvt Ltd-in thlakhatah Rs. 50,000 chawiin a luah mek.
Tourism department hian ISHM hi an puitlin thei dawn lo nia an hriat tak avangin Trade Promotion Council of India hnenah outsource mai turin hmalakna a kal mek a, tunah hian cabinet thutlukna nghah mek a ni. Hei hi PAC pawhin tha a tihpui a, hmalakna kal zel dan hrilh turin department hi a phut nghal a ni.