Kum a la tawp lo a, mahse kumin hi Mizoramah
ruihhlo vanga nunna chan an tam ber kum a ni tawh.
Mizoram Excise & Narcotics (MEN) department-in an chhinchhiah danin, December ni 1 thleng khan kuminah Mizoramah mi 68-in ruihhlo vangin nunna an chan tawh a, 2005 hnua ruihhlo vanga nunna chan an tam ber kum a ni.
An chhinchhiahna enin, 2004-ah khan mi 143-in ruihhlo vangin nunna an chan a, a kum leh 2005-ah mi 42-in; chumi hnuah 2023 hi kum a tawp hmain ruihhlo vanga nunna chan an tam ber kum a ni hman.
2020-ah khan mi 67-in nunna an chan a, 2017-ah 65-in, 2016-ah mi 59-in, 2018-ah mi 56-in nunna an chan. 2005 hnuah ruihhlo vanga nunna chan zat hi 2017 leh 2020-ah bak 60 a tling lo thin a, kumin hi 2005 hnua a tam ber kum a ni ta a ni.
Kumina nunna chante hi mipa 57 leh hmeichhia 11 an ni a, an vanduainaah hian heroin a tel vek. Mi 67 chu heroin leh damdawi ruihhlo vanga vanduaina tawk an ni a, mi dang pakhat chu heroin leh alprazolam vanga vanduaina tawk a ni.
MEN department hian 1984 atangin kum tina ruihhlo vanga nunna chan zat hi an chhinchhiah a, 1984 atanga 2023 December ni 1 thlengin mi 1804-in ruihhlo vangin nunna an chan tawh. Mipa 1588 leh hmeichhia 216 an ni.
Kum 19 chhunga ruihhlo vanga nunna chan tam ber kum
