Kum 1962-a bo tawh him leh dam takin hmu leh

Kum 1962-a bo tawh him leh dam takin hmu leh
Kum 63 dawn a chin hriat lohva awm tawh hmeichhe pakhat chu damin hmuh leh a ni a, amah pawh a dinhmun a tha tih Wisconsin, US-a police-in an sawi.
Audrey Backeberg-i hi a bo tirh hian kum 20 niin an khua, Reedsburg-a an in atanga July 7, 1962-a a chhuak chu a chin hriat loh zui a ni.
Sauk County Sheriff Chip Meister-a’n thu a chhuahah Backeberg-i bo dan hi ‘ama duhthlan a ni a, pawi khawihna emaw, thil sual tihna emaw a awm lo’ tih a sawi.
Sheriff hian Wisconsin pawn lamah a cheng tih a sawi a, a bak erawh a sawi thui lo.
Tlawmngai pawl, Wisconsin Missing Persons Advocacy chuan Backeberg-i hi a bo lai hian pasal neiin fa pawh pahnih a nei niin an sawi.
A bo hma lawk hian tuna kum 82 mi ni tawh, Backeberg-i hian a pasal lakah thubuai a thehlut a, kum 15 mi a niha a neih a pasal hian kut a thlak a, thahah a vau bawk niin a thlen niin an sawi bawk.
A bo ni hian a hna thawhna, la siamna hmun atangin a hlawh a la bawk.
An nau awmtu kum 14 mi chuan police hnenah Backeberg-i nen hian Wisconsin khawpui, Madison-ah an hawi khawthawng a, heta tang hian bus km 480 chuanga hla, Indianapolis, Indiana an pan zui tih a hrilh.
Nau awmtu hi a rilru a nuam thei lo va, haw a duh a, Backeberg-i hian a hnial a, bus dinnaah an inthen a, hmuh zui a awm ta lo a ni.
Sauk County Sheriff’s Office chuan kil hrang hrang atangin chhuituten an chhui a; mahse, kumin kum tir lama an ennawn leh hma zawng kha chuan chhanna rintlak an hmu thei lo.
A chhui chhuaitu detective, Isaac Hanson-a chuan tual chhung news station, WISN hnenah online-a chhungkaw inthlahchhawnna tar lannaa Backeberg-i laizawnnu thil dah chuan a awmna chin hriat theih nan a pui nasa hle tih a sawi.
Det Hanson chuan Backeberg-i chen meknaa sheriff-te a bia a, amah pawh phone-in minute 45 chhung a bia tih a sawi bawk.
“A bo chhui hi tihtawp ni tawhah a ngai niin ka hria a, tunah chuan ama duh angin hun a hmang mek a ni,” tiin WISN hnenah hian a sawi a. “Amah pawh a hlim hmel a, a thiltihah khan inchhirna pawh a neih hmel lem lo,” a ti bawk.