Mizoram State Legislative Assembly-ah kum 20 a liam hnu ah leader of opposition an awm leh a, tun term ah hian Lalchhandama Ralte chuan he hmun hi a luah a ni.
Leader of Opposition (LOP) tharin a sawi danin, he hmun chelh thei tur chuan State Assembly-a member awm zat atangin hmun 4li-a thena hmun khat tal member an ‘command’ a ngai a, seat 40 awmna Mizoram State Assebly-ah hian tunah eptu lama member ngah ber chu MNF niin, member 10 an nei tling a, LoP ni tura danin a phut zat hi an nei tling chiah a ni.
Kum 20 kalta chhung hian Mizoram Assembly-ah eptu bench-a thu party zingah LOP ni thei khawp member nei zo an awm ngai loa, hei vang hian ‘opposition group leader’ chauh an awm pha thin. LoP hnuhnung ber chu chief minister hlui Lal Thanhawla a ni.
Leader of Opposition hi cabinet rank niin, cabinet minister-in office leh chenna in lama a dawn leh neih tur ang, house guard thlengin chu pek ve vek a ni a, State Assembly leh Parliament hnuaia constitutional body hrang hrang awmah chuan member ni saa ngaih a ni ve bawk.
Zawhna chhangin leader of opposition Lalchhandama Ralte chuan sawrkar thil tih reng reng sawisel leh kalh vek an tum loa, an thil tih thaah chuan an thlawp dawn a, tha lo an tihah pawh ‘constructive’ zawnga kal hram hram an tum dawn tih a sawi a ni.
Kum 20 hnuah State Assembly ah leader of opposition awm
