Kum 2029-ah ruihhlo tawlhtu pawl tihtawp vek tum – Shah

Kum 2029-ah ruihhlo tawlhtu pawl tihtawp vek tum – Shah
Ruihhlo awm lohna India din tuma hma lak meknaah Union Home Minister Amit Shah-a chuan kum 2029-ah chuan ruihhlo tawlhtu pawl chu tihchimih vek an ni tawh dawn tih a sawi.
Patna-a Bihar Power Play conclave-ah NDTV Editor-in-Chief leh CEO Rahul Kanwal nena Zirtawpnia an inkawmnaah Shah chuan ruihhlo do beihpui chu kum li kal ta chhungin ‘ruahmanna tha tak’ nen thlak a nih thu a sawi.
“District level atangin state level leh Indian sorkar thlengin, ruahmanna angin hlawhtlinna chan mek zel a ni,” tiin Shah chuan a sawi a, Maoist-te nuai chimihtuma beihpui thlak ang bawkin ruihhlo tawlhtute pawh beih an ni dawn tih a sawi.
“Kum thum liam ta chhung khan ruihhlo tawlhtute leh sumdawngte man tamah record thar kan siam a ni,” a ti.
“Ruihhlova sumdawnna tihchhiat aiin a tawlhtu pawlte kumkhua atana titawp tura hma lak hun a ni a. Kum li lo awm leh tur chhung hian state leh sorkar laipui chuan heng mite hi a tichhe vek ang tih ka ring a; district level, state level leh national level-ah pawh a ni ang,” tiin Shah chuan a sawi.
BJP hruaitu hlun hian ruihhlo tawlh ruk nana hman kawngpui lian pathumah ‘ruahmanna felfai tak’ an nei tih a sawi bawk.
“Pakhat chu lui a ni a, pahnihna chu Pakistan atanga lo lut leh pathumna chu Myanmar atangin a ni a. Heng kawngpui pathum hi danchah turin ruahmanna felfai tak a awm,” a ti.
Nikum khan anti-narcotics agency hrang hrangte chuan cocaine kg 1,483 manin kum 2020-a an man zat let 78 chuang niin kum 2023-a man aiin a let liin a tam bawk tih Narcotics Control Bureau (NCB) chhinchhiahnaah tar lan a ni.
NCB-in kum tina an tihchhuah report-ah kum 2024-a an dinhmun chu September thla khan an tichhuak a. Hetah hian India-a la hriat vak loh, ruihhlo chi thar lut pung nasa zingah mephedrone (4-MMC leh meow meow tia sawi bawk) a langsar a, he ruihhlo hi party drug tia sawi pawh niin agency-ten kum 2024 chhung khan kg 3,359 an man a, kum 2020 kha chuan kg 275 chauh an man.
Shah-a chan, home affairs ministry hnuaia anti-narcotics agency chuan Pakistan atanga Punjab-a ruihhlo phur drone thlawh luhtir pawh kum li liam ta chhungin ‘a pung hle’ tih an sawi.
Heng drone-te hi ram himna tiderthawng thei thil ‘hlauhawm’ a ni mek tih an sawi.
Kum 2024 chhung khan ramri kâna Pakistan atanga ruihhlo phur drone lut hi 179 man a ni a, kum 2021 kha chuan pathum chauh man a ni a. Heng drone-in ruihhlo an phurh ber hi heroin leh opium a ni a. Ruihhlo kg 236 man a ni.
‘Death Crescent’ an tih, Iran, Afghanistan leh Pakistan hi heroin, Amphetamine-Type Stimulant (ATS) leh hashish te India-a luhna kalkawng ber niin khawthlang lam vaukamah an lut nasa a. Hetih lai hian ‘Death Triangle’ an tih, Myanmar, Laos leh Thailand ramte hi synthetic drug tia an sawi, methamphetamine luhna kawngpui ber ni ve thungin India khawchhak lam tuipui kamah an luhpui nasa tih an sawi.