Kum 2031 thlenga F1 dawl tur Monaco
Formula 1 leh Monaco chuan kum ruk chhung atana an inremna neihsa pawtseiin, he khawpui tlankawng phurawm zetah hian kum 2031 thleng Monaco Grand Prix an tlan zui leh phawt dawn tih nemngheh a ni.
Kum khan Monaco Grand Prix-ah Ferrari driver Charles Leclerc a chak ber a, a lo berah pawh kum ruk dang Monaco hian Formula 1 race a mikhual phawt dawn a ni.
Tarlan tak angin, he sport huanga race langsar leh mite ngaihven Monaco Grand Prix hi Covid hripui avanga 2020 season a khaihlak tih loh kha chu kum 1955 atang khan kum tin khel loin thlir tur a la awm ziah a; tunhnai kan hnung kum liamtaah khan a hmunhma leh race an sawngbawl vel dan chu han tihchangkan tumna leh chu mi tura nawrna lian chho hle thin mah se organiser lam chuan F1 kaltlanga television broadcast leh on-track advertising lam nawrna chu an la bengkhawn duh lo zui zel a ni.
Monaco Grand Prix chu kan hria a, Monte Carlo kawtthler zim takah tunlai F1 car changkang ber ber an intihsiak a, driver-te tan pawh inlehpelh mai mai a harsa a, mahse, hmunhma ngialnghet tawhte a lo ni a, tuipui thlirna hmun nuam tak a nih tel bawk avangin tlankawng tihdanglam chu tun thlengin an la puitlin zo lo.
Tuna contract pawhsei takah hian kum 2026 atangin June thla chawlhkar hmasaberah Monaco Grand Prix hi an tlan dawn a; F1 lam chuan tunhma atanga May thla chawlhkar hnuhnungbera tlan thin kum 2026 atanga an tawlh hlat tak chhan hi an tarlang lo.
2024 Monaco race hnehtu Leclerc kha Monaco tuiliak (Monegasque) driver zingah kum 1931 hnu lama home grand prix hnehna lawm leh thei hmasaber niin, kum 2022 khan Leclerc hian an rama race langsar hlun tawh tak mai chu calendar-ah lang chhunzawm zel se a duh thu a lo auchhuahpui tawh a ni.
Formula One race zinga driver-te chak thlakhlelhna leh an tana chona lian ni kumkhua Monaco-ah hian kum 1929 khan a vawikhatna’n an tlan tan a, world championship calendar-a a lan tan kum erawh 1950 a ni thung.
Monaco tlankawng leh a chhehvel hmunhma hrim hrim hi a zim a, mipui han punkhawm chiam theihna hmun a nih loh avangin he race hi intlansiak dangte nena khaikhin chuan entu tlem zawk hle angin a lang lo thei lo a, mahse, chu chuan ngaihven a hlawhna a dal chuang lo.
Automobile Club of Monaco president Michel Boeri pawhin chu chiah chu a tlangaupui thin niin, a hmunah fans tam thei lo mah se khawvel pumah television kaltlanga entu maktaduai tamtak an awm reng thu a sawi.
Tarlan tawh thin angin, street circuit ni ta chu driver-te tan inlehpelh mai mai a awlai lo a, qualifying lama chethate tan chak theihna chance a sang a, chu chuan racing quality a tihniam nia ngai pawl pawh an awm ve reng lo thei lo a ni.
F1 neitu Liberty Media lam hian he sport hi tihlen a, huang zauh zel an duh avangin 2024 season-ah hian calendar-ah race 24 an bilhlut a, hei hi an tlan kim thei a nih chuan F1 season khat chhunga race tlan hnem ber a ni ang.
Kum 2031 thlenga F1 dawl tur Monaco
