Kuminah thla khat tling lo deuh a la awm a, kum a la tawp lo. Mahse kumin hi tun hnai kum 21 chhunga ruihhlo vanga nunna chan an tam ber kum a ni tawh.
Mizoram Excise & Narcotics (MEN) department chhinchhiah danin, December ni 2 thleng khan kuminah Mizoramah mi 83-in ruihhlo vangin nunna an chan tawh a, 2005 hnua an tam ber kum a ni tawh.
2005-ah mi 42-in nunna an chan a, 2024 thleng khan 80 an tling ngai lo. 2023-ah mi 76-in nunna an chan a, 2020 leh 2024-ah mi 67-in nunna an chan. Kuminah 83 a ni ta dawrh a, 2005 hnua ruihhlo vanga nunna chan an tam ber kum a ni tawh.
MEN department-in an chhinchhiah danin, kumina nunna chante hi mipa 69 leh hmeichhia 14 an ni a, kum 17 leh kum 57 inkar an ni.
Mi 83-te zingah hian mi 33 chu heroin vanga nunna chan an ni a, mi dang 50 chu ruihhlo chi hrang hrang vanga vanduai an ni. Mi 50-te zingah pawh hian mi 47-te vanduainaah chuan heroin a tel.
MEN department hian 1984 atangin ruihhlo vanga nunna chan zat hi an chhinchhiah a, an tam ber kum chu 2004 niin, hemi kum hian mi 143-in vanduaina an tawk.
1984 atanga kumin December ni 2 thlengin mi 1962, mipa 1722 leh hmeichhia 240-in ruihhlo vangin nunna an chan a, nunna la nasa ber chu spasmo proxyvon/paron spas a ni a, mi 1161-in hetiang damdawi vang hian nunna an chan. Spasmo proxyvon/paron spas hi a chhuak tawh lo a, MEN department chhinchhiahnaa a lan danin, ruihhlovin nunna a lak nasat lai pawh hetiang damdawi vanglai hi a ni.
1984 atanga kumin December ni 2 thlengin mi 305-in heroin vangin nunna an chan a, parvon spas/spasmo proxyvon vangin mi 1161-in nunna an chan. Mi dang 496 chu ruihhlo chi hrang hrang vanga vanduai an ni.
Ruihhlo vanga nunna chan mi 1962-te hi kum 14 leh 57 inkar an ni.
Kum 21 chhunga ruihhlo vanga nunna chan tam ber kum
