Green Mizoram Day (GMD) vawi 26-na chu nimin khan Mizoram pumah hman a ni a. Sawrkar thuchhuahin a tarlan danin GMD hman tan kum 1999 atanga 2023 (kum 25) chhunga thingtiak phun zat chu 45,63,326 a ni a; chawhrualin thingtiak 1,80,000 chuang hret kum tin phun ziah ang a ni.
Kum 25 chhung thingtiak kan phun takah khan, thingtiak phunte a nung tha em tih enzui miah lovin kum 13 chhung zet chu kan lo awm mai mai a. Kum 2013 atangin thingtiak phun nun zui dan chhinchhiah tan niin a enkawl zui kawngah hma lak thar a ni a. 2013 atanga 2016 thlenga Green Mizoram report-in a tarlan dan chuan kum 2013-a thingtiak 72,241 phun atangin 62% a nung a; 2014-ah thingtiak 98,632 atangin 58% a nung a; 2015-ah thingtiak 81,233 atangin 70.53% a nung a; 2016-ah thingtiak 1,23,405 atangin 81.06% a nung bawk. Chawhrualin thingtiak phun nung zat hi 67% tihna a ni. Kum 2016 hnu lamah hian thing tiak phunte za zelah eng zat nge nung zui tih report hi hriat tur a awm mumal zui ta vak lo; a lo awm a nih pawhin mipui hriat tura tlangzarh zau a ni lo te pawh a ni ang e.
Kuminah hian thingtiak nuai khat chuang chu phun a ni leh ngeiin a rinawm a, chumi nen chuan thingtiak phun tawh zawng zawng hi nuai 47 chuang a ni dawn tihna a ni. Heti zat thingtiak kan phun tawhah hian 67% vel lo nung tha pawh ni se, a puitling chu a zatve vel chauh a la ni dawn tihna a ni nghal bawk awm e. Kum 25 chhunga thingtiak nuai 45-a nuai 30 vel nung tha a, nuai 13 vel puitling chauh a nih chuan, ramngaw tha siam tura hun a duh reizia a chhut thiam theih thuak mai awm e.
Ramngaw insiam chhungin hun a duh rei tehlul nen hian, kum khata thingtlang loneihna emaw sawhthing chinna emaw atana ramngaw, ramchang tha lai kan tihchhiat tamzia ngaihtuah hi chuan, GMD ringawta ngaihtha tur kan nih lohzia a chiang mai awm e.
Thingtiak phun hi a tha, a tha lutuk, i chawlhsan lo ang u, thingtiak phun i uar deuh deuh ang u. Chutih rual chuan, ramngaw kan tihchhiat nasat dan nen a inbuk tawk lo lutuk tih a lang reng a, ramngaw tichereu zawnga eizawnna bansan tura chak taka hmalak a tulzia a lang chiang em em a ni.
Kum 25 chhungin thing\iak nuai 45 chuang
