Kum 27 tang turin Brazil president hlui, Bolsonaro hrem

Kum 27 tang turin Brazil president hlui, Bolsonaro hrem
Brazil president hlui, Jair Bolsonaro-a chu sipai chakna hmanga sorkar paih thlak tuma puhnaah thiam loh chantir niin kum 27 lung in tang tura hrem a ni.
Thiam lohan chantir hnu lawkah Supreme Court-a justice panga thu zinga pali chuan hremna tur hi an pawm.
Kum 2022 inthlana a khingpui, Luiz Inácio Lula da Silva a hneh loh hnuah thuneihna chan zui tuma hma a laknaah thiam loh hi chantir a ni a. A dan hre mite chuan hremna chu ‘uchuak lutuk’ tia sawiin ‘dan anga an khin let ngei tur thu’ an sawi nghal.
Supreme Court-a an puhna ngaihtuahnaah a an puhna a dik ngei tih titlang tura judge pathum pawmpuina ngai chu paliin an pawmpui a. Judge pakhat a hai thung.
Kum 70 mi hi kum 2033 thleng an ram inthlan chuh thei lo turin hrem a ni bawk.
Bolsonaro-a hi pawn chhuak thei lova dah mek a ni a, a chungthu an ngaihtuahna hnuhnung lamah pawh hian a inlan lo.
A hma khan engmah tih sual a nei lo a ni tih a insawi a, kum 2026 president thlan a chuh theih lohna tura ruahmannaah puhin a chungthu an rel dan chu politics inher vang a nih thu a sawi thin bawk.
Hremna an pek hi a taka kalpui a nih chuan Bolsonaro hian a dam chhung lung inah a hmang dawn tihna a ni deuh der tawh a. A dan hre mi chuan lung ina tang lovin a ina tantir dan leh hremna nep zawk pek a nih theih nan hma lak an tum.
Dan angin thiam loh chantirna chu an khing dawn tih an sawi a; mahse, dan thiamte chuan court-a justice panga thua pahnih talin amah thiam an chantir a ngaih avangin hlawhtlin a harsa dawn niin an sawi.
Bolsonaro-a hi kum 2022 inthlana a chak loh hnua thuneihna chan zui tuma a chet dan avanga an puhna pangaah thiam loh chantir vek a ni.
Thu remtute chuan rei tak thuneihna a chan theih nan a hma atangin ruahmanna a nei tawh a, sipai commander-te pawh hel tura fuihin inthlanah thil fel lo a awm tiin a tlangau nasa hle bawk.
Bolsonaro-a hian Lula leh vice-president atana a dinpui thah leh Supreme Court Justice thah tumna pawh a hriatpui nia sawi a ni bawk.
Justice-te chuan sipai officer lawk tak tak telin ruahmanna a siampui mi pasarih dang pawh thiam loh a chantir a. An zinga pahnih hi defence minister hlui niin spy chief hlui leh security minster hlui an tel bawk.
Sipaiten pui mah se a tum hi a hlawhtling zo ta lo va, amah thlawptute hian January 8, 2023-ah sorkar government building-te pawh an luhchilh ngei tih thutlukna siam a ni ta a ni.
Rang taka boruak hmeh mih nghal niin mi 1,500 chuang man an ni.
Justice panga thua thiam loh chantirna tura vote thlak loh awm chhun hi Luiz Fux-a niin Nilainia darkar 11 chhung an ngaihtuah hnuah Bolsonaro-a puhna hi fiahna tha tawk awm lova ngaiin vote lakah a hai ta niin a sawi.
Ningania judge-ten vote an thlak zawh hnuah Justice Cármen Lúcia-i chuan Bolsonaro-a hian January 8, 2023 khan ‘helna’ a chawk chhuak tih sawiin amah tantu tam takin Supreme Court, presidential palace leh Congress an suasam.
An puhna panga – sipai chakna hmanga sorkar tumna, pawikhawihtu pawl kaihhruai, tharum hmanga mipui rorelna tihchhiat leh a dang pahnih, Brasília-a sorkar hmun pawimawh tihchhiat kaihhnawihah thiam lo an ti vek ti.
Police-ten a thubuai hi a fapa, Eduardo-a nen engtin emawa tihchingpen a tum nia an sawi avangin August thla atang khan pawn chhuak thei lova dah a ni.
Justice Cármen Lúcia-i’n thiam loh an chantir tih a puan tan hnu lawkah a aiawha court-a ding a dan hre mi chuan a sawi zawh hun pawh nghal lovin a chhuahsan.