Mizoram vawh ber thla chu January a ni tiin a sawi theih a, January aia thla dang a vawh zawk tum a awm chang chu a awm ve. Kuminah pawh January kha a vawt a, kum dang January aiin a vawt tiin a sawi theih ang.
Thla liam ta kha kum 36 chhunga a vawh ber thla chu a ni lo a, mahse kum 36 chhunga a vawh thla tiin a sawi theih.
State Meteorological Centre-in kum 36 chhunga January thla vawh dan an chhut a, 1990 January atanga 2026 January thleng khan, Aizawl vawh ber lai chawhrualin 11.1°C, a lum ber lai chawhrualin 23.2°C a ni. Chuta tanga chhut chuan 1990 atanga 2026 thlenga January thla vawh lam chu chawhrualin 17.1°C a ni a, kumin January bik kha chu ai chuan a vawt. 2026 January-a khaw vawh lam kha chawhrualin 16.5°C a ni. Chuvangin thla liam ta kha khaw vawh thla a ni chiang mai.
2026 January kha January vawh ber tum chu a ni lo a, 1992 January vawh lam kha chawhrualin 14.7°C a ni.
January hi Mizoram thlasik nat ber lai a ni thin a, 1990 atanga 2026 thlenga January thla a vawh loh ber tum, 2019-ah pawh chawhrualin 20.1 a ni. 20.1°C hi a sang lo.
Kumin January-ah a vawh ber laiin, January ni 6-ah khan 9°C a kawk a, ni 4-ah 10°C a ni.
Lum leh vawt tehnaah hian ni khat chhunga a vawh ber lai leh a lum ber lai an chhinchhiah thin a, kumina a vawh ber lai, 9°C a nih ni January ni 6-ah khan a lum ber laiin 20°C a ni. 9°C leh 20°C hi chawhrualin a hniam a, mihring tan khua a vawt ang.
January thla tawp lam a vawt vak lo a, khua chu la vawt tho mah se thla chawhma lam aiin a lum.
Kum 36 chhunga a vawh thla kumin January
