Kum 5 chhunga lirthei chesual vanga thi 355

Kum 5 chhunga lirthei chesual vanga thi 355
Kum 5 chhungin Mizoramah lirthei chetsualna tum 423 a awm a, mi 355-in nunna an chan phah bakah hliam tuar 400 chuang an awm.
Senior SP Traffic Police Aizawl office buatsaihin Nilaini khan thuthar thehdarhtute nen traffic chungchangah inkawmkhawm a ni a. Senior SP Traffic Stephen Lalrinawma’n record an neih thar ber atangin lirtheia chetsualna leh dan bawhchhiatna kaihhnawih a sawi a. Kum 2019 atanga 2023 chhungin Mizoramah lirtheia chetsualna tum 423 a thleng a, mi 355 an thih phah. Fimkhur loh hrim hrim vanga chesual an tam ber a, 289 awmin nunna chan phah 253 an awm. Ruihtheih thil tih vanga chesual 85 awmin nunna chan 69 an awm. Wrong side-a lirthei khalh vanga chetsualna thleng 44 awmin, 28-in nunna an chan phah. Mobile phone hman vanga chesual 5 awmin nunna chan 5 an ni.
Kum 2023 bikah hian lirthei chetsualna thlenga nunna chan zingah, tlan chak vanga thi 49 (51%) an awm a; two wheeler hmanga chesuala thi 26 (27%) an ni.
Lirthei dan bawhchhia tam ber two wheeler an ni a, 2023-ah hian dan bawhchhia 14683 awmah two wheeler bik 10274 an ni a, a dawttu chu LMV niin 3198 an ni a, taxi dahhran niin pathumna a ni a, 663 an ni. Hemi kum bika lirthei dan bawhchhiate sum chawi hi a vaiin Rs. 102,73, 212 a ni. Kum 2024-ah pawh dan bawhchhia tam ber chu two wheeler niin, 7252 an ni a; a dawttu pawh LMV tho niin 2104 a ni a, a pathumna pawh taxi bawk niin 403 an ni. An sum chawi tlingkhawm hi Rs. 73,10, 602 a ni.
MJA member-te tana traffic kaihhnawih inhrilhna hi DIG (Northern Range) C Lalthanmawia chuan hmanpuiiin, lirthei kaihhnawih dan bawhchhiatna avanga sum chawi atang hian traffic lam tihchangtlunna leh mipui zirtirna lamah engemawzat let ve leh thei se an hlawkpui hle dawn tih chu hman atanga an lo rawt fo thin a ni tih a sawi.
8 Kum 2019 atanga zirnaah kum 2022 atangin lirthei chetsualna a pung lehzual a, a hma kum thumahte lirtheia chesual hi kum khat chhungin 70 thlenna a awm loh bakah nunna chan pawh 50 an kai loh vek laiin, 2022 khan chetsualna 133 a awm a, heng zinga 94-ah hian nunna chan an awm.
8 2023-ah chetsualna tum 106 thlengin nunna chan phahna tum 80 a thleng. Hemi hun chhung vekah hian lirthei chesual avanga inhliam pawh 2022 hnu lamah a letin (200 a kai) a sang a ni.
8 Lirthei chetsual hun tam ber lai hi zing dar 3-6 inkar a ni a, tum 78 (21%) a thleng. Chhun dar 12.00 leh chawhnu dar 3.00 inkarah tum 66 (18%), tlai dar 6.00 atanga zan dar 9.00 inkarah 56 (15%), zing dar 9.00 atanga chhun dar 12.00 inkarah 49 (13%), zan dar 9.00 atanga zanlai dar 12.00 inkarah 43 (12%) a ni.
8 2019 – 2023, kum 5 chhung hian Mizoramah lirthei chetsualna avangin mipa 305 leh hmeichhia 50 an thi a, hliam tuar mipa 330 leh hmeichhia 82 an awm a ni.
8 Aizawl Municipal huamchhung bikah kum 2023 khan lirthei chetsualna tum 22 thlengin heng zinga 14-ah hian nunna chan phah an awm a, mi 16 thiin hliam 22 an awm. 2024-ah lirthei chetsualna tum 26 thlengin, heng zinga 23-ah hian nunna chan an awm a, thi 26 leh hliam 15 an awm a ni