Kum 5 chhungin lirthei chesuala nunna chan mi 400 chuang an ni

Mizoramah 2018 atanga 2022 chhung khan lirtheia chetsualna avanga nunna chan mi 408 an awm a, zirchiannaah lirtheia chetsual thlenga zaa 75 hi a khalhtu thiam loh (mawhphurh) a ni.Mizoramah 2018 atanga 2022 chhung khan lirtheia chetsualna avanga nunna chan mi 408 an awm a, zirchiannaah lirtheia chetsual thlenga zaa 75 hi a khalhtu thiam loh (mawhphurh) a ni. Kumin February 1-29 chhung hian Mizoram State Road Safety Council hmalakna in ‘Road Safety Month 2024’ hman a ni dawn a, Ningani khan Transport minister Vanlalhlana hoin a hawnna hman a ni.
Transport department hotute sawi danin, kum 2018 khan Mizoramah lirtheia chetsualna avanga nunna chan mi 65 an awm a, 2019 ah 62, 2020 ah 52, 2021 ah 90, 2022 ah 139 an awm. 2020 hi Covid len lai, inkharkhip vangin a tlem phah deuh niin a lang a, 2022 ah chuan a hmalam aiin a letin a pung hluai. Chawhrualin kumtina lirthei chesuala nunna chan hi mi 60 tling ziah anga chhut a ni.
Lirthei chetsualna thleng thin mithiamten an zirchiannaah, zaa 75 chu driver thiam loh vang a ni a. A dang zaa 25 chu chhan dang vang a ni tih a sawi a ni bawk.
Transport minister chuan 2023 April – December chhung khan Mizoramah lirthei register thar 301680 a awm a, thla 9 chhungin kum hmasa lirthei register a khum a. Kawngpui than chak aia lirthei nasa taka pung chuan khawpui tawt siamin kawng inchuhna a siam mek a ni, tiin, hemi karah hian lirthei khalhtute chu hawihhawm leh dan ngaipawimawh chunga khalh turin a chah.
Mizoram chu mipui cheng zat atanga chhuta lirthei chetsualna avanga nunna chan tamna a ni tih a sawi a. Kum 2021 leh 2022 dinhmun khaikhinin road accident 92.8% in a pung a, nunna chan pawh 101.79% in a pung tih a sawi. Nunna hlu tak leh sum pai tam tak hlohna chu pumpelh a nih theih nan theihtawp chhuahpuiah mipui a sawm a. Himna tura dan siamte tha taka zawm turin a chah.
“Lirthei chetsualna thleng thin hi fimkhur deuh se, pumpelh theih tam tak a awm ka ring. Chuvangin, Road Safety Month kan hman tur hi a pawimawh hle a ni,” Vanlalhlana hian a ti.