Kum 2018 atanga kumin July thleng khan Mizoramah ruihhlo tawlh leh hralh kaihhnawihah mi 5295 man an ni tawh a, hemi chhunga ruihhlo hrang hrang man hi cheng vaibelchhe 8000 chuang hu a ni.
Mizoram State Legal Services Authority chuan The Narcotic Drugs and Psychotropic Substances Act 1985 chungchang inhrilhhriatna Zirtawpni khan Pachhunga University College zirlaite tan a buatsaih a. He hun hmanpuitu Mizoram State Legal Services Authority executive chairman, Gauhati High Court judge Justice Michael Zothankhuma chuan kum 2018 atanga chhiarin kumin July thleng khan Mizoramah ruihhlo chi hrang hrang, court hmaa thlenpui kg. 4520.606 man a ni tawh tih a sawi a. Ruihhlo kaihhnawiha man mi 5295 zingah 3954 chu thubuai siamsak an ni a. Ruihtheihthil hrang hrang man hlut zawng hi Rs. 81,29,95,21,468.89 hu a ni tih a sawi.
“Mizoramah ruihhlo in bu a khuar mek lai hian thalaite hi kan harhchhuah a ngai. Ruihhlo avangin thalai tam takin harsatna an tawk mek a, ram hmasawnna hna thawk tur thalai tam tak home hrang hrangah leh jail-ah khung boa an awm hi a pawi em em a ni,” a ti.
Kan ram hmelma, ruihhlo chu theihtawpa do a ngai tih sawiin, “Ruihhlo bawia tang mekte chhanchhuak tur hian theihtawp kan chhuah a ngai a, chutih laiin a la ti ve loten ruihhlo bawiah hian an luh lohna tura tan lak a ngai,” Justice Michael Zothankhuma hian a ti.
Resource person Dr Chawnglungmuana chuan ruihhlo ti tawh te chhanchhuahna kawnga hmalak dan tur leh a enkawl zel dan tur, ruihtheihthil tih that loh zia, ruihhloin mihring nun a nghawng dan, ti lo tura lo inven dan, ruihhlo ngaite enkawl dan a sawi bawk.
Court lam record-a a lan danin, kum 2018-ah ruihhlo chi hrang hrang kg. 598.886, 2019-ah kg. 1479.677, 2020-ah kg. 815.731, 2021-ah kg. 580.632, 2022-ah kg. 756.471 leh kumin July thlengin kg. 289.209 Mizoramah man a ni a; Kumin January atanga August thla tir lam thlenga report dawn chinah heroin kg. 95.683 man a ni tawh.
Kum 5 chhungin ruihhlo cheng vbch 8000 chuang hu man tawh
