Eizawnna lamah chuan ukil leh chanchinbumi a ni a, Alejandra Marisa Rodriguez, kum 60, chu Miss Universe Buenos Aires-ah an thlang a, May ni 25-a Miss Universe Argentina thlannaah hian Buenos Aires aiawhin a tel leh ang. Alejandra hi Miss Universe Buenos Aires ni thei upa ber a ni.
Miss Universe Buenos Aires hi Argentina aiawha Miss Universe-a tel tur thlannaa ram then hrang hrang (province) aiawh tur thlanna a nia, contestant 34 awmin, kum 18 atanga kum 73 inkar an ni. Alejandra chuan, “Beauty pageant thlir dan thar aiawhtu ka ni thei tur hi ka phur khawp mai, a chhan chu, pianphung mawina chauh ni lo, hlutna leh mawina thlirna tlang dang atanga thlirna, kalphung thar kan chuangkai dawn a ni,” a ti.
May ni 25-ah hian Miss Universe Argentina thlanna Buenos Aires khawpuiah hian an nei leh dawn a, Argentina ram then hrang hrang aiawh te an inel dawn a, heta winner hi September ni 28-a Miss Universe thlanna a Argentina aiawhtu tur a ni.
Miss Universe hian kumin atangin kalphung thar an hmang dawn a, kum hmasa lamah chuan Miss Universe-ah hian kum 28 hnuailam te chauh tel theih a ni a, tunah chuan kum upat lamah bithliah awm tawh lovin, hmeichhe kum 18 chin chu an tel thei vek tawh dawn a ni.
Miss Universe kalphung thar tur hi New York Fashion Week-ah khan 2023 Miss Universe R’Bonney Gabriel-i’n a lo puang tawh a, ani hian nikuma Miss Universe thlannaah pawh khan pageant’s question segment-ah he issue hi a lo sawi chhuak tawh a, chumi tum chuan, “Kei chuan a tel thei chin kum bithliah hi tihpun theih ni se ka ti khawp mai, a chhan chu kum 28 a upa ka ni tawh a. Chu chu a tel thei chin bithliahah kum upa ber a ni a, a mawi danglam riau asin. Mi thusawi ka duh em em chu, ‘Tunah a nih loh chuan engtikah nge ni ang?’ tih hi a ni. Hmeichhia ka nih angin, kum hian kan nihna a tilangin ka hre lem lo. Naktuk ni lo, nimin ni lo- tun hi pawimawh chu a ni. Tun hi a hun dik chu a ni,” tiin a lo chhang tawh nghe nghe a ni.
Kum 60 mi Miss-ah an thlang
