Kum 74 chhunga Delhi lum ber tum thleng
Delhi chuan kum 74 hnua February-a zan a lum ber tum tawngin Ningani zan khan a vawh lai berin Safdarjung-ah chuan 19.5°C a ni a, kum 1951 aTanga 2025 inkara a lum ber Tum a ni tih India Meteorological Department (IMD) chuan a sawi.
“Safdarjung-ah hian February 27, 2025 zan khan a vawh ber laiin 19.5°C a ni a. Kum 1951 leh 2025 inkara February-a zan lam vawh ber lai a san ber hun a ni,” an ti a. Kum 1951 hma lam chu chhinchhiah a awm lo tih an sawi bawk.
A hmaa February-a zan lam a lum ber chu February 25, 2015 kha niin 19°C a ni.
Vanah chhum a tam hle a, Ningani khan Delhi-ah hian a lum lai berin 25°C niin a nih dan thin pangngai aiin 1.1°C-in a hniam niin IMD chuan a sawi.
Nilaini kha tun thlasika a lum ber tum a ni ve thung a, a lum lai berin 32.4°C a ni.
Skymet Weather Vice President Mahesh Palawat chuan khawpui berah hian chhum tam leh thli vawt thaw nasa avangin Ningani aTang khan March 3/4 vel thleng khua hi a vawt leh hret dawn niin a sawi lawk.
March chawlhkar khatna aTangin khawthlang lam aTangin thli lo thawkin hei hian tlang lamah vur pawh a tlaktir thei dawn nia sawi lawk a ni.
Palawat chuan March 10 vel aTangin Delhi-ah chuan thlasik tawpin boruak a lum tan ang a, khua hian vawh lam a pan tawh dawn lo niin a sawi.
Darkar 24 liam ta chhung khan ram khawpui berah hian boruak thianghlim lam tehnaah chuan ‘chhia’ a ni a, AQI chu 215 a nih thu Central Pollution Control Board (CPCB) chuan a sawi.
AQI hi 0 leh 50 inkar ‘Tha’ a ni a, 51 leh 100 inkar ‘Tha pangngai’ a ni a, 101 leh 200 inkar ‘la awm theihna’ a ni a, 201 leh 300 inkar ‘chhia’ a ni a, 301 leh 400 inkar chu ‘chhe tak’ niin 401 leh 500 inkar chu ‘hlauhawm’ a ni.
Kum 74 chhunga Delhi lum ber tum thleng
