Kum 96 mi niin school a kal tha leh a, exam-ah 98% a hmu
Kerala-a classroom pakhatah chuan a tûte rual lek lek zingah a thu ve rân mai a, a exam sheet chu enin, pencil chu a hum khur deuh der der a, a ngaihtuahna a sawrbing nasa hle a ni. Kum 96 mi a ni tawh a, a dam chhunga a exam vawi khatna a ni. Tichuan, result a chhuak ta a, mi zawng zawngin an lawmpui. Karthyayani Amma chuan mark 100-ah mark 98 a hmu! A dam chhung hun tam zawk ziak leh chhiar pawh thiam lo a lo hmang ral tawh tan chuan hlawhtlinna ropui tak a ni. Kan pi tan chuan record siam leh chanchinbu a lan tih vel a thupui ber lo a, a tawpa tawpah hawrawp a chhiar thiam ta a, chu chu a duh ber a ni.
Karthyayani Amma chu 1922 khan Kerala-a Alappuzha district a thingtlang khua, Cheppad-ah a piang a, a rualpui hmeichhe naupang dang ang bawkin an hunlai chuan hmeichhe naupang an nih avangin lehkha zirna kawng a inhawng ve tlat lo. Retheihna leh chhungkuaa mawhphurhna avangin lehkha zir tura scool kalna chance pawh a nei ve ta lo.
Naupan lai atangin mahni theih ang ang thawkin, chhungkaw tana tangkai theihna tur an dap sak nghal a ni ber mai a, kum naupang tein pasal a nei a, fa paruk a nei a, nitin inhlawhchawpin an khawsa ve naw naw thin a ni.
Ziak leh chhiar thiam a châkna chuan kum upat lam a ngaihtua tir thei lo va, kum 90 ral kai tawh hnuah a tharthawh ve leh ta a ni. Hetianga an tiphur thar lehtu pawh hi a fanu a ni a, a fanu pawh hi kum 60 ral kai tawh hnuah a in-exam a, a pass a. A fanuin a tih theih chuan, kei pawhin ka thei ang, tiin lehkha a zir ve ta a ni.
Kum 96-ah Karthyayani Amma chu 2018 khan Kerala State Literacy Mission Authority hnuaia Aksharalaksham literacy programme-ah a inziak lut ta a. He programme hi school zirna dawng mumal lo, kum lama upa tawh si te tana ziak leh chhiar bakah mathematics bulthut zirna a ni a, exam-ah ziak leh chhiar bakah mathematics te a tel a ni.
Karthyayani chanchin chu Kerala-ah a thang chhuak a, mite ngaihven a hlawh a, chanchinbu-ah a lang a, mi langsar tak tak an kawm a. 2019-ah chuan kawvel huapa zirna chawisan kawnga thawktu pawl Commonwealth of Learning goodwill ambassador a ni ta a, India sorkar pawhin Indian hmeichhia te tana chawimawina sang Nari Shakti Puraskara hlan ta hial a ni. Karthyayani Amma chuan October 2023 khan kum 101 mi niin mual a liam ta a, mahse, a chanchin erawh a nung reng tawh dawn a ni.
Kum 96 mi niin school a kal \ha leh a, exam-ah 98% a hmu
