Kum kaltaah RTI dan
hmanga dilna lut 5741
Sawrkar kum kalta chhung khan Mizoramah RTI dan hmanga dilna lut 5741 a awm a, dilna thehlut zingah an dilna bawhzui that loh avanga State Information Commission-a lungawilohna thlen chu zaa 1 pawh an tling lo tih sawi a ni.
Mizoram tlawhtu chief information commissioner of India Heeralal Samariya chu Nilaini khan larsap Dr Hari Babu Kambhampati chuan Raj Bhavan-ah a kawm a, RTI Act chungchanga pawimawh hrang hrang a sawipui.
Inkawmnaa tarlan danin, Mizoramah sawrkar kum kalta 2023-2024 chhung khan RTI Act hmanga dilna lut 5741 awmin, dilna lut chinfel zel a ni a, second appeal hmanga State Information Commission-a lungawilohna thlen chu zaa 1 pawh a tling lo. Insawifiah tura koh an nih hmain heng zinga zaa 90 hian RTI Act hmanga information diltu hnenah chhanna kimchang an pe vek hman a ni.
Larsap chuan sawrkar tha, rin ngam leh langtlang siam kawnga pawimawh tak, Right to Information (RTI) Act chu mipuiin an hmelhriat chho zel a, tangkai taka hman a ni tih a sawi a. RTI Act buaipuitute chu mipuiin information dik leh rintlak an hriat zel theihnan theihtawp chhuaha hma la zel turin a chah.
CIC of India chuan hmundang ngaihtuahin Mizorama RTI hmanga dilna lutte hun bituk, ni 30 chhunga tha taka chinfel nghal zung zung a ni thin leh, zaa 1 aia tlemin thuneitu sang zawk – first appellate authority leh second appellate authority an thleng chu lawmawm a tih thu a sawi a. Hei hian RTI Act buaipuitu official, NGO, village council/ local council leh mipuiin he dan hi an ngaihven tlang tih a tarlang tih a sawi a ni. RTI Act chu sawrkar tha siam kawnga hmanraw pawimawh tak a ni, tiin, sawrkar laipuiah kumtin RTI dilna 20000 vel second appeal kaltlanga dawn a ni a, case tam zawk chu a hnuailamah chinfel a ni thin tih a sawi bawk.
Kum kaltaah RTI dan hmanga dilna lut 5741
