Kum kaw hnuah South Korea-a nau piang zat bi pung
Khawvela nau piang zat bi (birthrate) hniamna ber, South Korea-ah chuan kum 2024 khan a bi hi a pung hret a, kum kaw chhunga a pun vawi khatna a ni a. Hei hi company leh Korean-ten nu leh pa nihna zirna an pek nasat vang a ni.
Kum 10 liam ta chhung khan South Korea-ah hian nau piang zat bi hi a hniam zawngin a kal nasa a, hei hi hmeichhiaten inneih leh nu nih aia hna an dah pawimawh vang a ni a, hei hi in leh naupang enkawlna man a san zel vang a ni leh bawk a. Hetiang zela an kal chuan tun kum zabi zahve a thlen hi chuan mihring maktaduai 51 chenna ramah hian a zahve velin an tlem dawn nia chhut a ni.
Kum 2024 khan South Korea-a nau piang zat bi hi hmeichhe pakhat zelah 0.75-ah kaiin a hma khan 0.72 a ni a, kum riat zet, kum 2015-a 1.24 a nih hnua an tlakhniam char char chu a pung zawngin a kal ve leh ta a. Crude birthrate an tih, mi 1,000 zela nau piang zat chu 4.7 a ni a, hei erawh kum 2014 atang khan a hniam zawngin a la kal zel tho niin Statistics Korea chuan a tar lang.
Nau piang zat bi a pun chhan lian ber chu hripui a len laia inneih theih lohva rei taka awm kha an inneih tak sup sup vang a ni a. Hei bakah hian sorkarin hna leh chhungkaw inbuktawk, naupang enkawl leh in neih policy thar tam tak a duan vang a ni bawk.
Nikum khan President Yoon Suk-yeol chuan ministry thar siamin hei hi an rama ‘mihring pung muang’ dotu tur bik an ni.
Kalphung an thlak zingah hnathawkte nu leh pa an niha an fa avanga chawlh an lakin thla ruk thleng an chawlh chhung an hlawh bi kim pek vek turin an ti a, a hma chuan thla thum chauh a ni thin.
A tul a nih phei chuan kum khat atanga kum khat leh a chanve thleng pawh pawh sei theih turin an ti bawk.
Kum kaw hnuah South Korea-a nau piang zat bi pung
