Eirukna case chungchang chhui tura din Lokayukta-in kum khat chhungin case 12 an nei a, pakhat chu tihtawp a ni tawh.
Budget Session neih mekah House-ah Mizoram Lokayukta Annual Report 2021-2022 pharh a ni a, he report bu-ah hian Mizoram Lokayukta chanchin leh 2021-22 chhunga case an neih zat te tarlan a ni.
He report bua a lan danin, case 12 an ziaklut a, chung zinga case pali chu preliminary enquiry tih mek a ni. Case pakhat chu preliminary enquiry ti lova tihtawp a ni a, 2021-22 chhunga case tihtawp zat chu pathum a ni.
Case pangaah chuan department leh mimal insawifiahna nghah mek a ni.
Mizoram Rural Bank, Serchhip Branch-a sum chheprelh chungchangah CBI ngaihchan mek a ni a, Mizoram Rural Bank, Bungzung, Keifang, Vaivakawn leh Lawngtlai Chanmari Branch tea sum bo chungchangah ACB ngaihchan mek a ni bawk.
Mizoram Public Service Commission-in tourist officer an lak dan chungchang chu finfiahna (evidence) a awm loh avangin he case hi tihtawp a ni. He case hi online hmanga complaint an dawn vanga chhui an ni a, Mizoram Lokayukta website-ah complaint an awm a ni.
A din hnuah Mizoram Lokayukta hian case 42 an ziaklut tawh a, case pathum chu preliminary enquiry ti lova tihtawp niin, ACB leh CBI te nena chhui case pakua a awm.
Kum khat chhungin Lokayukta-ah case 12
![](https://theaizawlpost.org/wp-content/uploads/tap_logo-min-large.jpg)