Pathianni zan Fifa World Cup final-a champion lai Argentina laka kawng engkima chungnung Spain kha a hmei-a-pain tunlai football-ah an chungnung chiang hle a, tunhnai kum nga chhunga under-17 atanga senior level-in world leh European title an lak belhkhawm hi 16 tehreng a tling ta!
Kum hnih liamta mai Berlin khaw final-ah England hnehin an men’s national team chu Europe champion an ni a, tunah world champion ni lehin, La Roja hian kum 2010-a World Cup trophy an chawi hma kum hnihah Euro 2008 title an hlawhchhuak bawk!
Tarlan tak angin, Spain hi men’s leh women’s game-ah an kal tluang rei ta viau a; kum 2023 khan Sydney khawpuia Women’s World Cup final-ah an hmeichhiate’n England nulate hnehin trophy an sualchhuak a, Pathianni zana an mipa team an champion ve leh tak avangin tum khata men’s and women’s World Cup champion ni thei hmasaber an ni.
An mipa team hian kum 2023 khan Nations League trophy leh 2024 Olympics-ah gold an awrh a; kum 2024 leh 2025 khan an women team kutah Nations League title a lut bawk.
Spanish football expert Guillem Balague chuan Spanish football-in khawvel a awpbeh dan hi sawi chhuakin, “Duhthusam thlipui kan tlehtir mek a; duhtawk kan ngah duh lo lai hi a paiwmawh lai tak chu a ni,” a ti.
December 2022-a Spain boss atana Luis de la Fuente an sengluh hlim khan hun reilote chhunga Nations League (2023), Euro (2024) leh World Cup (2026) hnehna a chanpui ring an tlem ngawtin a rinawm!
Qatar World Cup-ah khan last 16-ah Morocco hneh loin an tlawm a, federation lam khan boss bang ta Luis Enrique hmunruak luahtu tur an zawnna lamah club lian enkawl pawh la nei lo De La Fuente lam an hawi a, men’s European Championship hnuhnung vawi thum (2008, 2012, 2024)-a champion vek thei La Roja meuh enkawl tur chuan risk a sang hle nain Spain style leh system hrethiam tak a lo ni hlauh a, tun hi a thlenpui ta a ni!
Kum 1994-a football khelh a chawlhsan hnu khan De La Fuente hian club hrang hrangah kum 15 chhung team enkawl hna a thawk a, a hna chelhte chu Spanish league hniam lama manager hnate bakah youth team enkawl leh assistant coach hnate niin, a hnuah Spain youth team-ho enkawltir a ni.
Senior boss-a hlankai a nih hma hian under-19s, under-21s leh Olympic level-ah Spain a lo kaihruai tawh a; De La Fuente hnuaiah hian Spanish footballer-te chuan an tumpuite zah tlatna culture an nunpui a, dawhtheihna leh hun khirhkhanah pawh chi-ai mai loa cool raih theihna an than hnan a, chu’ng infinkhawm chu an football thiamna piahlama an hlawhtlinna bulpui a rawn ni chho ta zel a nih hi!
Spain midfielder hlui Juan Mata pawh khan De la Fuente hnuaia Spain hlawhtlinna thuruk sawi ve bawkin, player tam zawkte chu academy an luh lai atanga a hriat tawhte leh team-a an thanglian lai hmutu leh dawmkangtu a nih tlat avangin a fuh lo thei lo tih a sawi a, a pawmawm ngei mai!
“Tuna in hmuh team hi tun atan mai an ni lo a, hmalam hun atana kan vauchher zel tur an la ni,” tiin chuai mai mai lo tur team an nih thu a tarlang tel.
Tun dinhmunah Spain hi inelna hrang hrang match an khelh hnuhnung 38-ah an tlawm lo mek a, European leh South American team zinga tlawm pumpelh zawn rei ber an ni hial nghe nghe.
Chuti ang team chu 2030 Fifa World Cup-ah pawh Argentina team kan hmuh ang nawk nawka defending champion hahthlak ni lo turah beisei chhin phawt teh ang!
Kum nga chhunga title 16 tehreng hawn thei Spain!
