Lalhmangaiha Sailo
Holy Cross Bakery
Ph : 9436360275
Dam leh hrisel tak maia kum sawmriat (80) chuangkai phak nih hi Pathian malsawmna ropui tak a va han ni tehlul em!!!
Khawnge kum sawmriat thleng pha chin te awmdan leh dinhmun awm te in thlir dawn mai mai teh ang. Kum sawmriat han kai chhoh tawh chuan mar zata han din te hi a har a, han kal lahin kan awn deuh du a, mite hmuha pangngai deuha kal han tum deuh pawhin, khup alo zawi a, kan dursuih deuh ut a, kan kal mumal thei lo. Hetih hunah hi chuan tiang hawl hi a thain a tih chi khawp mai. Mahse, tiang han hawl hian min ti tar in, upa lehzual ni te hian langin kan inhria a, kan hreh deuh roh si. Remhre deuh chuan nihliap kan han hawl a, mahse khawthat nia han hawl chhuah zen chu ni meuhin kan hre si lo.
Mi thenkhat kum 70/80 tlin hmaa beng hriatna chak lo, bengchhet tih mai tur an awm. An aw a chhangin a chher a, an awkiin mi pangngai awki a rem lo a, han zai ve vak chang te hian bula mite aw a pawl thei lo a, a lai viau thin ni tur a ni, an nuih ru tet tet thin.
Chhiatni thatnia han tel ve changte hian, YMA thutthleng, cushion an phah dup deuh chan loh phei hi chuan, mawng hi a kham thuai a, bul ami te hriat hlau deuh roh hian mawngtam ko kham kan thlak tawn sek thin.
Biak in inkhawm te hian thawhlawm lakkhawm chhung, zai tui deuh tuma hla vawihnih vawithum han nawn hnu a, Chairman-in thawhlawm hlan chunga min han din zuitir chang te hian, han thut mai bik kha ni meuhin kan hre si lo, kawng kham hi kan zi tawlh tawlh thin.
Chhungten inchhung sekrek khawih tur tak ngial atan pawh min beisei tawh lo, inthlahrun deuh changin han inrawlh ve tum deuh thin mah ila, kan der deuh luk a, an rem ti lo. Vanglai ni hun te kan ngaihtuah a, tar chak lo kan ni tih pawh in hre lo lekin kan lo phe ve sek thin. Puipun nikhua leh engemaw hlekah tel ve phet kan tum a, mahse rualpui awm deuh te hmel hmuh tur an awm loh chuan, thalai zingah kan hlim thei lo. Chhungkua, khawtlang leh ram tana thil tha, hmasawnna tur ruahmanna mumal tak nei ve thin mah ila, mahni lam rul leh chak tawk tawh lohna avang te in eng kan ang vak thei lo.
Vanglai hun te kan ngaihtuah a, thianho ah leh pawl han ding hlek se, hruaitu leh hotu a min hmatheh hun lai te kan ngaihtuah mai mai a.
Inchhungkhur sitting room leh chaw eina (dining) room thlengin, kan tu leh faten, kha chu ka pu thutna a nih kha, tih mai tur khawpa thutna bik te kan nei tawh a. Inleng lut nei hlek ila, a beng ngawng ber hi bengvar berah tangin lo chiau au teh kan tum a. Inbe hlek se eng lam thu nge an sawi tih hre hawt lo hian hriat ve tum ni awm tak hian, beng tha lam dawh duk hian kan thlek ang duk duk thin.
Aw le, kha kha a tlangpui thuin kum 80 chunglam, mi hrisel pangngai te dinhmun leh awmdan a ni ber a. Kum 90 dawn te pawh an awm nual ang. Mi thenkhat erawh chu Alzheimer leh natna chi hrang hrangin a tlakbuak, mahni inchhung baka vakchhuak thei tawh lo leh thenrual pawl phak ve tawh lo leh mumal vak tawh lo te, kum 80 ral kai tawh an awm thei bawk a. Hetiang hun han thleng phak nih hi, a vanneihthlak tak meuh meuh a ni.
Hetiang hun thleng phak ten engtin nge kan hun hmawr lam hi hlim leh mumal takin kan hman thin ang le!!!
Kum 60 leh kum 70 inkar hun: Hetih hun hi mithiam, la chakvak deuh, sawrkar atanga pension hlimte tan hun tha lai a ni awm e. Hmasawn zelna tur in leh lo benbelna hun leh ram siam tha tura Politics Field-a zuan luh hun tak pawh a ni awm e.
Kum 70 leh kum 80 inkar : Hetih hun hi hrisel leh chakvak deuha thleng pha kan tam lo, a thleng pha ten Project eng eng emawte buatsaih a, phur taka hma han la turin rilru lamin tlin mah se, kan chaknain a tlin tawh lo. Tu leh fa thachhang dawl thei leh rintlak neite tan erawh an phurpui thei deuh mahna.
Kan vanglai hun te a liam a, kan hlim kan lungngaih leh lawm ni ten mual an liam zel a, tun kan hun hnuhnung lam, ni tin hun te hi engtin nge i hman ve thin le!!! Nunhlui leh hun kal tawhte kan ngaihtuah a, lung a leng thin, thiante kan ngai a, kan in liamsan zel bawk si. Aizawl veng thenkhatah chuan thian inpawlho, hlim taka hun hmangho thin an awm. Tuikuala ‘HNAH LA PAWL HO’ te, Chawnpui venga thian inpawlho ni ngei tur Pu Bawia Sailo varanda a inkawmho thin te leh Mizoram Agriculture, Horticulture, Irrigation, Officer Pension Association (MAHIOPEN) te hian an hun hnuhnung ‘Last Period’ hi an hmang thiam khawp mai. An inpawl khawm thin bakah, damlo leh vakchhuak hlei thei tawh lote inkan-chhuahna hun te hmangin an intlawh liam liam thin.
Tun hunah hian eng Period (eng stage) ah nge i awm ve le. Valai deuh i nih pawhin i nun uluk la, i taksa ngeih tur ei leh in thlengin fimkhur la, a khat tawkin doctor-te hmuin i hriselna in check-up thin ang che. Zuk leh hmuam, ruih theih lam i fihlim lo i nih chuan ‘Last Stage’ kum 70-80
i thleng pha lo hlauh dah a nge, sim vat rawh.