Kum a thar a, khawvel ram dangte ang bawkin Zoramah pawh mi engemaw zatin hna an tan leh tawh. Khawhai-ah pawh hna an tan tawh a, mahse kumina an hna hmasa ber chu Lalpa tan an ti.
January ni 3, Zirtawpni khan hna an tan a, hemi nia an hna chu Pathian tan an hlan. Thing an phur a, chu chu Kohhran tan an thawh.
Khawhai-ah hian kum dangah pawh tiang hian an ti thin a, kum engemaw zat chu kum thara an hna hmasa ber hi Pathian tan an lo thawk tawh thin.
An khuaah hian Presbyterian Kohhran pali a awm a, a hlun ber Khawhai Presbyterian Kohhran-in tun hma atangin hetiang hian hna hmasa ber chu Lalpa tan tiin an lo thawk tawh thin. An hnen atanga in dang Presbyterian Kohhran pathumte’n an chhunzawm a, kohhran pawl dangte’n an ti thin bawk. Kum tinin Khawhaiah chuan mipuiin hna hmasa ber Lalpa tan an thawk thin tiin a sawi theih ang.
Khawhai Presbyterian Kohhran-a an upa pakhat Upa PC Lalremruata chuan, “Tih zel chi-ah kan ngai a, kan ti zel a nih hi,” a ti.
Anni kohhran hian January ni 3-a hna an thawh chu thing phurh a ni a, member 178 zinga 118 an thawk chhuak. Nunau an tel a, naupang kum nga mi pawh an awm. Upa lam, kum 70 chuang tawhte an tel bawk. Sunday School Hall an sa mek a, chutah chuan mi thenkhat an hnatlan avangin thing phur hi an thahnem lo deuhvah an ngai.
He thil an tan hun chiah hi hriat a ni lo a, 1980 hma lamah pawh an lo ti tawh tih chu an hria.
Khawtlangah chhiattawk leh vanduaina tawk an awm avang te, harsatna eng emaw avanga an tih theih loh kum a awm a, Covid-19 hrilen lai khan kum hnih chu an ti thei lo bawk. An tih theih loh kum hi chuan nuam an ti lo thin tih an sawi.
“Kum thara hnathawh ni hmasa berah hian mahni tana thawk lovin Lalpa tan i thawk ang u tih hi a awmzia chu a ni a, kum thara kan hna hmasa ber hi Pathian tana thawh kan duh a ni,” tiin Upa PC Lianthanga, Khawhai Presbyterian Kohhran hruaitute zinga mi chuan an sawi.
Kum tharah hna hmasa ber Lalpa tan
