Lirthei a pung chak a, Mizoramah hian mihring tam lama chhutin lirthei a tam. A pung zel a, a pun dan pawh a namai lo.
Kum a thar a, ni 19 chhungin Mizoramah lirthei thar 1913 a awm leh tawh a, kum tharah pawh lirthei a pung nghal.
Kumina lirthei thar hi transport 175 leh non transport 1738 a ni a, two wheeler leh car a tam.
Thla dang ang bawkin January ni 19 thlenga kumina lirthei tharah hian two wheeler a tam ber a, two wheeler (non transport) 1465 leh two wheeler (transport) pathum a awm. Two wheeler (transport) hi two wheeler taxi a ni. Three wheeler (transport) pathum a awm bawk a, hetiang hi auto rickshaw a ni.
Motor car 265 a awm a, two wheeler dawtah car a tam. Bungraw phurhna chiin a dawt leh a, light goods vehicle 112 leh heavy goods vehicle 21 a awm. Khualzin phur chi light passenger vehicle 30 a awm bawk.
Transport department chhinchhiah danin, Mizorama lirthei ziah luh (register) tawh hi 4,29,209 a ni a, lirthei atanga chhiah lut tawh zawng zawng hi Rs 4,76,38,63,629 a ni. Kuminah lirthei chhiah atanga sum hmuh tawh hi Rs 2,24,74,695 a ni.
Lirthei hi kum tin a pung a, kum liam taa lirthei thar ziah luh kha 30336 niin, a hma kum aia a punna hi 1.08% a ni.
Tun hnaia
lirthei thar zat
Kum Lirthei
2022 27025
2023 28695
2024 30012
2025 30336
Kum tharah lirthei thar 1900 chuang awm leh tawh
