Kum thum indo hnuah an khawpuiah Sudan sorkar kir leh ta

Kum thum indo hnuah an khawpuiah Sudan sorkar kir leh ta
Sudan-a sipai kaihhruai sorkar chu indo chungin khawchhak lama Port Sudan-ah kum thum dawn an inkulh hnuah an khawpui ber atanga rorel turin an kir leh ta.
Prime Minister Kamil Idris-a chuan Pathianni khan ‘beiseina sorkar’ chu Khartoum-ah an kir leh ta tih thuthar lakhawmtute hnenah a sawi a, khawpuia chengte harsatna tawh hrang hrang ching fel tura hma an lak tur thu a sawi.
Sipai sorkar hi kum 2023 atanga tual chhung indonaa an beih, paramilitary Rapid Support Forces (RSF) chuan an um chhuak a. Nikum March thla khan khawpui hi la let lehin tunah chuan thutchilh leh turin an kir leh ta a ni.
Khartoum hi kum tam tak chhung indona avanga chhia niin a tho leh tan mek a. UN-in a chhinchhiah dan chuan mi maktaduai nga velin khawpui hi an tlanchhiatsan hman a ni.
RSF-in an thunun chhung khan eng ang takin nge khawpuiah hian ro an rel tih hriat theih a ni lo va; mahse, inrawkna leh an fighter-ten mi in leh lo an chhuhsak ang chi chu a tam hle tih sawi a ni.
Khawpui hmun tam tak a chhia a. October thla khan UN hotu, Ugochi Daniels-a chuan mipuiten ni tin an mamawh ang chi chu ‘tha a lawi a awm lo’ niin a sawi.
Pathianni khan Idris-a chuan electricity, tui, damdawi in leh zirna titha turin hma an la nghal dawn tih a sawi.
Kum 2026 hi indona a chhuah atanga mi 1,50,000 vel thihna thlenah Sudan-ah ‘muanna kum’ atan an puang tih a sawi bawk.
UN chuan Sudan hi mipui baihvaina ram nasa berah puangin mi maktaduai 12 velin indona avangin an in leh lo an chhuahsan tih an sawi.
Sudan-a tual chhung indona hi sipai hotu, General Abdel Fattah-al Burhan-a leh a deputy, RSF hruaitu, General Mohamed Hamdan Dagalo-a inkara thuneihna inchuhna a awm atanga chhuak a ni.
An indo chhungin RSF leh Sudanese sipaite hi civil mite laka rawng taka che leh dan pela che-ah an inpuh tawn ve ve.
Ram dang atangin inremna a awm theih nana hma lakna a hlawhchham zel a, lehlam lehlam hian ram dang atanga puitu, ralthuam leh mamawh dang petu an nei ve ve bawk.
United Arab Emirates (UAE) pawh tun hnaiah RSF a pui nasa nia sawi niin dem pawh an hlawh a, anmahni erawh chuan chutiang hmalakna an neih loh thu an sawi ve thung.