Kum upate enkawlna inah enkawl lai 9 an awm mek

Kum upate enkawlna inah enkawl lai 9 an awm mek
Enkawltu awm lo kum upate tlukluhna, State Senior Citizens Home Aizawlah mi 9 an awm mek a, a upa ber chu kum 96 mi a in.
Larsap Gen. Vijay Kumar (Retd) chuan Ningani khan Social Welfare department hotute a kawm a. An department kaltlanga upate enkawlna kalpui dan leh pension pek dan a sawipui.
Larsap chuan Mizo khawtlangin upate ngaihsaka an dah pawimawh thiam thin chu lawmawm a tih thu a sawi a. Kum upate chu a tlangpuiin chhungte nei leh enkawlna tha dawng ni mah se, baihvai an awm changa an tlukluh ngamna tur hmun changtlung tak neih a tul tih a sawi. Mal ngawih ngawiha inhriatna leh tangkai lo nia inngaih tlatna nuaibo sak a tul, tiin, harsatna an tawhte ngaithlaa kaihruai turin councellor pek chu thil tih makmawh a ni tih a sawi a ni.
Social Welfare department-in harsatna a tawh leh mamawh an thlen chu a tul ang zela bawhzui sak a tum tih a hrilh bawk.
Social Welfare department hotute report danin, upa pension (Indira Gandhi National Old Age Pension Scheme) hamthatna dawngtu Mizoramah mi 24524 an awm mek a. Heng zingah hian kum 60-79 inkar 15393 awmin, monthly pension Rs 1200 (sawrkar laipui tum Rs 200 leh state sawrkar tum Rs. 1000) an dawng. Kum 80 chin chunglam 9131 awmin, monthly pension Rs. 1500 (sawrkar laipui tum Rs 500 leh state sawrkar tum Rs. 1000) an dawng a ni.
National Social Assistance Programme (NSAP) hnuaiah Aadhar seeding 97.96% leh mobile seeding 90% zawhfel tawh niin, hmarchhak state-a ti tha ber zingah Mizoram a tel. The Mizoram Maintenance and Welfare of Parents and Senior Citizens Rules 2013 hnuaiah sub-division level-ah Maintenance Tribunal leh district level-ah Appellate Tribunal din niin, tun thlengin kum upate enkawlna kaihhnawih case lut a la awm lo. Kum 1989-a din mi 10 awm theihna State Senior Citizens Home Aizawlah mi 9 (mipa 6, hmeichhia 3) awm mekin thawktu 10 an awm a. Vawiin thlengin mi 79 (mipa 53, hmeichhia 26) enkawl tawh niin, admit zinga upa ber chu kum 96 a ni.
Department hotute sawi danin, upa pension dawng thei zat tur hi sawrkar laipuiin a rawn bituk sa vek a, tunah hian dilna 7500 chuang a awm khawl tawh. Thihna avangte a nih ngawt loh chuan hamthatna dawng tura thar thlan a harsa a, Mizoramin tun aia hamthatna dawngtu tam zawk a neih theihnan hma lak tul an tih thu larsap hi an hrilh.
Upa pension bakah NSAP hnuaia scheme dang – Indira Gandhi National Widow Pension Scheme (hmeithai pension), Indira Gandhi National Disability Pension Scheme (vohbik pension) leh National Family Benefit Scheme (chhungkaw eizawngtu ber a thiha chhawmdawlna) hnuaia tanpuina pek thinah, state-in a tum ve tura tih chu 2024 April 1-ah Rs.100 atangin Rs. 1000-a a tihsan a ni a, hetiang bawk hian sawrkar laipui tum ve tur pawh tihsan a tul tawh tih an thlen bawk.
Inkawmnaah hian upate enkawlna kalpui dan leh an tana hamthatna awmte buaipui kawnga hma lak tul sawiho a ni a. Rilru lama harsatna an tawh lohnan senior citizens home-a counselling service kalpui a tul thu, nakin zel atan tun aia changtlung leh lian zawk upate enkawlna home ruahman lawk a tul thu, day care centre, palliative care training leh tul dangte sawiho a ni.