A Grand Slam title paruk sualchhuah tawh zinga la tel ve lo awmchhun Australian Open trophy lak ngei tumin world number one Carlos Alcaraz chuan Melbourne a thleng tawh a; kumin Melbourne Park-ah hian a champion zo tawh a nih ngat chuan mipate zinga Grand Slam tournament hrang thiau palia champion kim vek thei naupang ber a ni ang.
Kum 22 mi lek ni chungin Spaniard hi French Open, Wimbledon leh US Open-ah a champion kim vek tawh a, tuntum Melbourne Park-ah hian a hlawhtling leh a nih chuan a kum 23-na piancham herchhuah hma ni hnih la awma 1938 French Open title latu Don Budge-a record ding rei lutuk tawh khumin Grand Slam title pali la kim thei mipa player naupang ber a ni dawn.
Chu chu mi chungchang chu nikum November thla daih tawh khan Alcaraz hian sawiin:
“Kum tharah hian French Open leh US Open title ka kawl lai humhim aiin ka Australian Open trophy hmasaber tur sualchhuah ka duh zawk,” a ti.
Kumin May ni 5 herchhuah ruala kum 23 pumhlum chiah tur Alcaraz hian Australian Open hnuhnung pahnihah khan quarter-final thleng ve ve mah se last four a lut zo lo ve ve a.
Kumin hian hun rei tak coach atana a lo chhawr tawh world number one hlui Juan Carlos Ferrero banin beiseina thar nen Melbourne Park a pan a, kum sarih chhunga Grand Slam champion nihpui zawih zawihtu Ferrero tel loa a major tournament hmachhawn hmasakber tur hian ngaihven pawh a hlawh hle tura ngaih a ni.
Rawlthar mai ni chunga Grand Slam tournament pathuma Alcaraz champion-pui thei khawpa coach fak hlawh Juan Carlos Ferrero leh world number one inthen ta mai kha a hun laia tennis khawvela sawi hlawh berte zingah a tel hial a; Ferrero tel loa Alcaraz-a’n a career-a Grand Slam fiahna lian ber a hmachhawn tur hi kumin Australian Open tingaihnawmtu tur pakhat a ni!
Alcaraz hian nikum khan a career-a season tha ber a nghakchhuak a, Grand Slam title pahnih a lak bakah world number one ranking a lakir a, mahse, a coach hlun tel loa a la chetfuh theihlohna Melbourne fiahna a hmachhawn tur hian amahah ‘pressure’ lian tak a thlen ve ngei dawn a, chu mi a paltlang dan tur chu tennis khawvel hian a thlir rawn mek a ni.
Kumin Melbourne Park-ah Alcaraz dingchang zo dawn em?
