Kumin March atanga chhiarin leilung chhiatna avangin chenna in leh building sang 5000 chuang a chhe tawh a; nunna chan phah mi 42 ab awm tawh.
Mizoram State Disaster Management Authority (SDMA) chu an chairman, chief minister Lalduhoma hoin Thawhtanni khan an thukhawm a. Heta report a nih danin, kumin March atanga May thla thlenga leilung chhiatna vanga chenna in leh building dang chhia 5938 report a awm tawh a; kumin chhunga disaster avanga nunna chan chhinchhiah mi 42 an awm tawh.
Thutkhawmah hian SDMA sum dinhmun report a ni a; inkaihhruaina ang zelin an hmang chhuak thin tih sawi a ni. Tunhnaia Disaster Management & Rehabilitation hmalakna report a ni a; Mizorama hmun parukah lirnghing nat zawng tehna khawl (seismic observatory) dah mek a ni tih sawi a ni bawk.
Chief minister chuan Cyclone Remal vanga sawrkar laipui atanga chhiatna endiktu, Inter Ministerial Central Team chuan sawrkarah report an thehlut tawh a, Finance ministry-ah a awm mek tih a, tanpuina engemawzat min rawn pek beisei a ni tih a sawi a ni. Thutkhawmah hian DM&R minister K Sapdanga bakah a kaihhnawih minister-te leh an secretary te, chief secretary leh official dang an tel a ni.
Thurel leh sawi ho dang:
* Chhanchhuahna hmanrua leh leilung zirna tur hmanrua engemawzat lei an rel.
* Hlimen leh Melthuma leiminin in leh lo a tih chhiatsak chhungkaw 41 chen lailawkna tur siam a nih thu report a ni.
* Hlimen leh Melthuma hmun him tawk loa ngaihte umzui zel dan tur an sawi bakah mihring chen tamna hmuna leimin thleng nasa thin tihnep nan tui luankawr leh thli paih dan mumal zawk zir tur Study Team din an sawi a ni.
* African Swine Fever vanga harsatna tawk chhungkuate tanpui dan tur sawi niin, mumal zawka chhawmdawlna an hmuh theih dan tur ruahman nise, an ti.