Damdawi zuar turin phalna lak a ngai a, drugs license nei lovin damdawi a zawrh theih loh. License neite’n dan an zawm a ngai a, dan an zawm loh chuan a tihtawp theih. Kuminah pawh drugs license hi 23 tihtawp (cancel) a ni tawh.
Health & Family Welfare department hnuaia Food & Drugs Administration (FDA) wing te’n kuminah July ni 15 thleng khan drugs license hi 23 an cancel tawh a, damdawi ruih theih zawrh vanga cancel an tam ber.
FDA-in an chhinchhiah danin, damdawi ruih theih chi, codeine, syrup, tramadol, alprazolam, tapentadol leh a dangte an kawl vang leh dik lo taka an hralh avanga license tihtawp pakua an awm a, Siaha-ah panga, Aizawlah pahnih, thingtlang khaw dangah pahnih an awm. A dange chu an phalna neih anga kal lo conditions of license bawhchhiat vang te, license neituin a surrender vanga cancel te an ni.
Cancel bakah hian tihtawp lailawk (suspend) a awm bawk a, kumin FDA hian drugs license 137 an suspend tawh.
Thu dawn danin, suspend chhan hrang hrang a awm a, restricted license nei damdawi dawrah an license huam phak loh damdawi, tam thama zawrh a nihin a tirah zuar tawh lo tura hriattir an ni phawt a, thla hnih thla thum hnua an endik lehin an zawrh loh tur an lo la zawrhin an license chu tihtawp lailawk (suspend) a ni thin. Damdawi dawrah pharmacist an rawihin danin a phut anga a enkawl lohvin license hi an suspend thin bawk. Damdawi ruih theih, ruih nana hman thin kawl leh hralh vangin an suspend thin bawk.
Kumina drugs license an suspend-ah hian a tam ber chu Aizawl khawpui huam chhunga mi a ni a, Aizawlah hian ngawrh taka an endik avangin suspend pawh a tam tih thu dawn a ni.
Kuminah drugs license 23 titawp tawh
