Tunlaiin zu a tam a, ruihhlo hluar thu hian a hliahkhuh deuh pawh a ni mai thei; zu hi a tam a, man tur pawh a tam, a man lah an man hnem. Man loh pawh a tam turah ngaih a ni.
Mizoram Excise & Narcotics (MEN) department-in kuminah July thla thleng khan tualchhung zu, rakzu litre 43,082.791 an man a, thla sarih chhunga an man hi a tam tham hle.
Nikum khan kum tluanin rakzu hi litre 59694.420 an man a, kumina thla sarih chhunga an manin a thlau vak lo. Zu bilh lai (fermented rice) pawh tin 83,436 an man tawh a, zu siamna bel 1,602 leh dawidim (yeast) kg 247.640 an man tawh bawk.
A sen chi pawh an man hnem tawh; kuminah July thla thleng khan a sen chi (IMFL) um lar bera ngaih ml 750 dawng chi um 13,736 an man tawh a, nikum kum tluana an man aiin hei hi a tam tawh. Nikum khan um 13,578 an man.
IMFL hi litre khat um pawh um 22 an man tawh a, ml 500 dawng chi um 22 leh ml 375 dawng chi um 2,023 an man tawh. ML 375 dawng chi hi ml 750 dawng chi tih lohah chuan a lar.
Tualchhung zu ang bawkin a sen chi hi a tam a, Aizawlah chuan awlsam takin a neih mai theih nia sawi a ni. Kawng chhia vanga harsatna tawh lai, ni tin eichawp thilte pawh a van laiin a sen chi hi a vang chuang lo tih thu dawn a ni.
Kuminah rakzu man hnem tawh
