Kuminah ramri hrulah Pakistani drone 100 man tawh

Kuminah ramri hrulah Pakistani drone 100 man tawh
Border Security Force (BSF) chuan kuminah Punjab-a Indo-Pakistan ramri hrulah ralthuam, puak thei leh ruihhlo tawlh ruk nana firfiak pawlten an hman drone 100 an man tawh tih an sawi.
“May 18, 2025 thleng khan BSF chuan India ram chhungah Pakistani drone 100 kan man tawh a, heroin kg 111, ralthuam 60, hand grenade 14 leh puak thei dang kg 10 a tel,” tiin Indo-Pakistan ramri vengtute chuan Thawhtanni khan an sawi.
BSF chuan heng thil an mannaah hian India-a lut ru Pakistani pathum an kap hlum a, phal loh thil tawlhtu Indian 66 leh Pakistani pathum an man bawk.
Kum 2024 khan BSF hian ramri hrulah hian hetiang drone hi 294 an hmu chhuak tawh bawk.
Kumina BSF-in drone an hmuh chhuah 100-te hi China-in a siama a hralh chhuah – DJI Matrice, DJI Mavic leh DJI Air te an ni.
Chhuitute chuan kum li liam ta chhung khan Pakistan-a firfiak pawlte hian India-a ruihhlo leh hmanrua thawn luh ruk nan Punjab-a ramri hrul hmun hrang hrangah drone an hmang thin tih an sawi.
Kum 2-3 thum liam ta chhunga Pakistan atanga drone hmanga ralthuam thawn luh thin hian India-ah pawi khawihna tam tak a thlen niin an sawi a. Heng zingah hian Punjabi zaithiam, Sidhu Moosewala-a thahna leh nikuma firfiakten Jammu-a sipai panga an thahna pawh kha a tel niin an sawi.
Heng bakah hian August, 2023-a Sarhali, Punjab-a police station-a thil tihpuah te, Punjab vek, Mohali-a May, 2022-a RPG hmanga Punjab Police intelligence wing headquarters kah te pawh kha ramri kân drone hmanga ralthuam leh puak thei thawn kal zel hrin niin an sawi bawk.