Fur lai a ni a, Mizoramah ruah tui a tam hle. Fur laiin ruah a tam a ni mai lo a, kumin hian ruah tui a tam – kum hmasate aiin a tam rih.
May-ah a mak a maka tam ruah a sur a, June-ah a tam leh hle. July-ah pawh a tam leh hle bawk.
State Meteorological Centre-in an chhinchhiah danin, Kuminah July ni 31 thleng khan Mizoramah ruah hi mm 1369 a sur a, nikum khan January ni 1 atanga July ni 31 thlengin mm 951.6 a sur. Nikum leh kumina thla sarih chhunga ruah tui tla zat hi a intam hleih hle.
Kumin July thla chhung ruah tui tla zat hi mm 358.5 a ni a, nikum July thlaah khan mm 291 a tla.
May atang khan ruah hi a la sur char char a ni ber; May thlaah khan mm 519 a sur a, kum dang May thlaah hetianga tam hi a la sur ngai lo. June-ah mm 353.7 a tla a, hei pawh hi tam tham tak a ni. Mahse nikum June-ah khan mm 381.7 a tla a, kumin June aiin hei hi a tam.
July-ah hian ruah a tam na a, ni khata tam tham taka sur tlawrh chu a awm lo tiin a sawi theih ang. May-ah te kha chuan tam taka sur tlawrh tlawrh kha a awm a, July-ah hi chuan tam vak lovin a sur deuh reng ve thung. July ni 1-ah khan mm 84.2 a tla a, ni 2-ah mm 79 a tla. Heng bak hi chu tam tlawrh tlawrha sur a nei lo a, a sur ngun thung.
Ruah a sur deuh reng bawk a, khua pawh a vawng dai; July thlaah a lum ber laiin degree Celsius 30 a ni a, chu pawh chu vawi hnih khat chauh a ni.
Kuminah ruah tui a tam tluang zel e
