Kuminah ruihhlo nuai 162 hu
Champhai district-ah man tawh
Kumin, January 1 atanga March 28 thleng khan Champhai district-ah Police leh Excise & Narcotics Department chuan ruihhlo chi hrang hrang tualchhunga an hralhna anga chhutin Rs. 1,62,88,325 hu an man tawh a, a tam ber hi heroin a ni.
District Level Narco Coordination Centre (NCORD) Committee, Champhai District na chu Nilaini khan an chairman, bawrhsap James Lalrinchhana hoin an thukhawm a. Champhai District Police leh Excise & Narcotics Department hmalakna kaltlanga ruihhlo man zat leh Narcotic Drugs and Psychotropic Substances Act (ND&PS Act) 1985 hnuaia case ziahluh dan tlangpui report a ni.
NCORD thutkhawm hnuhnung ber, kumin February 16 atanga vawiin March ni 29, 2023 inkarah Champhai District Police te’n ND&PS Act, 1985 hnuaiah case 8 an ziaklut a, hemi kaihhnawihah hian mi 10 man niin heng zinga 2 te hi ramdang mi an ni. Heroin gram 3666 (hawng 314) manin, department chhut danin tualchhung rate-ah Rs 94,20,000 a ni.
Hemi hun chhung vek hian Excise & Narcotics Department Champhaiin ND&PS Act 1985 hnuaiah case 5 ziaklutin hemi kaihhnawihah hian mi 5 an man a, heng zinga 2 hi ramdang mi an ni. Heroin gram 210, tualchhung rate-a Rs 2,52,000 hu an man a ni.
Kumin January 1 atanga March 29 thlengin Champhai District Police-in ND&PS Act 1985 hnuaiah case 20 an ziaklut a, hemi kaihhnawihah hian mi 27 man niin heng zinga 6 hi ramdang mi an ni. Heroin gram 6305.96 (hawng 524) manin, department lam chhut danin tualchhung market-a a hlut zawng Rs 1,57,20,000 a ni. Heng zinga hawng 16 man hi Assam Rifles nena thawkduna man a ni. Ganja kg 6.35, tualchhung rate-a a hlut zawng Rs 9,525 hu Assam Rifles nen tangduna manin, Alprazolam mum 450, tualchhung rate-a Rs 15000 hu an man bawk. Ruihhlo man zawng zawng hlutna hi tualchhung rate-a chhutin Rs 1,57,44,525 a ni.
Kumin chhung vek hian Excise & Narcotics Department Champhai chuan ND&PS Act 1985 hnuaiah case 15 ziaklutin hemi kaihhnawihah hian mi 21 an man a; heng zinga mi 5 hi ramdang mi an ni. Heroin gram 1199, department lam chhut danin tualchhung rate-a Rs 5,43,800 hu an man a; heng zinga gram 840 (hawng 70) hi Assam Rifles nena thawkduna man a ni.
NCORD hi kum 2016-ah din a ni a, kum 2019 khan siamthat niin tunhnaiah chak lehzuala hma lak a ni a. 2022 May 10-ah District Level NCORD Committee member-te state sawrkarin a siamfel a; hmalaknate Narcotics Control Bureau lamah report zel a ni.
Kuminah ruihhlo nuai 162 hu Champhai district-ah man tawh
![](https://theaizawlpost.org/wp-content/uploads/tap_logo-min-large.jpg)