Kuminah TB kai 595 hmu tawh
Chawhrualin kumtinin Mizoramah TB kai mi 2000 hmuhchhuah ziah anga chhut a ni a, kuminah thla thum chhungin TB kai 595 hmuh an ni tawh.
TB Elimination Accelerator Project hmalakna hnuaiah Ningani khan District Jail Aizawlah health camp neih a ni a. He project-in a tum ber chu, Mizorama TB vei la hriat chhuah lohte a tam thei ang ber hriat a, damdawi leh enkawlna tha pek thuai niin, khawl thar leh thiamna (hand-held x-ray leh cough AI application) hmangin hmun hrang hrangah health camp neih tum a ni.
Hmalakna hmasa ber atan District Jail Aizawlah hian health camp neih a ni a. District Jail-a thawktute leh awm mek mi 76 chu medical team-ten enin, vawiin – Zirtawpni hian chhunzawm tum a ni.
He project lo chhuah chhan chu, World Health Organisation (WHO) in kum 2030-ah TB do rem tumin beihpui a thlak a. India ramah chuan Prime minister hmalakna in kum 2025-ah TB hi umbo tum a ni. Mizoramah TB umbo a nih theih nan sawrkar laipui chuan hmalakna thar tam tak a nei a. Central TB Division chuan development partner hrang hrang – USAID, WHO, Piramal Swasthya Management & Research Institute, Jhpiego leh Wadhwani AI te nen tawnghoin TB Elimination Accelerator Initiative Project neih a ni.
Chhinchhiah danin, Mizoramah TB vei hi kumtin mi 2000 chuang hmuhchhuah ziah ang a ni a, nikum khan TB vanga thi 108 an awm. Kumin January leh March inkar khan TB vei mi 595 hmuh chhuah an ni.
Kuminah TB kai 595 hmu tawh
