Kolasib District Fast Track Court judge R Vanlalena chuan a ni zawnin kum tling lo pawngsualtu mi pahnih chu thiam loh a chantir.
Kolasib district khaw pakhata hmeichhe kumtling lo, kum 14 mi chu mi pakhatin bike-a tlanbo puiin a pawngsual zui niin hmeichhe naupang pa hian Police Station-ah FIR a thehlut a. FIR a thehluh hma ni 5 kalta vela thil thleng nia sawi a ni.
Police-ten pawngsualtua puh Mangtindama, Khamranga cheng thin, Tahan Myanmar lam mi nia insawi chu manin, an chhuichianna report hi court-ah an thehlut a. Kolasib Fast Track Court judge hian thuhretu hrang hrang leh ukil-te thusawi a ngaihthlak hnu ah, pawngsualtua puh hi thiam loh a chantir a. Amah hi Kolasib District Jail-a tang lai a ni. Vawiin, November 23 hian a hremna tur a tichhuak ang.
2020 January 15 khan nu pakhat chuan a fanu kum 17 mi chu an school headmaster-in a pawngsual tia puhin dan anga hma la a, chhuichiang turin police station-ah FIR a thehlut a, police chuan pawngsualtu puh Vanlalrawngbawla (31) Kawnpui Vengthara cheng chu manin, a lakah thubuai ziahluh a ni.
Police-ten thubuai an chhuifiahna report hi court-ah thehlutin, Kolasib Fast Track Court judge chuan thuhretute thusawi a ngaihthlak hnu ah pawngsualtua puh Vanlalrawngbawla hi thiam loh a chantir a. Kolasib District Jail-ah dahluh nghal a ni. A hremna chu November 29 hian a puang ang.
Kumtling lo pawngsualtu pahnihin thiam loh chang
