Labour, Employment, Skill Development & Entrepreneurship (LESDE) buatsaih ni hnih awh State Level Skills Competition 2024 chu Nilaini khan khar a ni a, state aiawha national level inelnaa tel turin mi 16 thlanchhuah an ni.
Kharna hmanpuitu LESDE addl. secretary K Lalhmingliana chuan skills lamah Mizote kan sang a, India ramah pawh langsar tham kan ni thei, tiin, skills hmangin kan ram leh hnam chu nasa taka chawikan theih a ni tih a sawi. Thalaiteah skill development lama harhtharna a thlen zel avangin ITI-a zir duhte pawh an in chan vek lo thin a, lehkha kan zir rualin thiamthil zirna lam kan ngaihpawimawh a tul hle tih a sawi a ni.
LESDE director Angela Zothanpuii sawi danin, khawvela skills lama intihsiakna lian ber – Skills Olympic an tih bawk, Worldskills Competition 2024, Lyon France-a neih turah India aiawh thlanna – Indiaskills Competition-a tel turin state aiawh intihsiak hi March 5 & 6 hian Aizawlah neih a ni a, mi 47-in trade hrang hrang hnuaiah intihsiak hmachhawnin, state aiawh tur hi thlan an ni.
Thlanchhuahte hi thla khat chhung an trade theuhah chherhriam belh an ni anga, kumin April-a national competition-ah Mizoram aiawhin intihsiak an hmachhawn dawn a ni. Indiaskills Competition-ah hian Mizoram hi kum 2022 atang khan a tel tan a, a tel hmasak berah hian shoe making-ah gold medal leh floristry-ah silver medal a dawng a ni.
Kut themthiam inelnaa State aiawh tur thlang
