Kut tuarte hnena zangnadawmna
District Legal Services Authority (DLSA) Aizawl chuan Thawhlehni khan pawikhawihna tuartu mi pathum hnenah zangnadawmna a hlan a. Kumin March 21 khan mi 14 hnenah zangnadawmna hi a lo hlan tawh bawk.
Crime victim compensation inhlan hi DLSA Aizawl chairman, Aizawl District & Sessions judge Helen Dawngliani hoa hman a ni a. Mizoram BAR Association-in an telpui. Mi kut tawrh avanga thi leh kumtling lo pawngsual tawk pathum hnenah zangnadawmna, a vaiin Rs 4,50,000 semchhuah a ni a; an zingah hian Aizawl Hospital doctor, mi kut tuara thi Dr Laltanpuia, Kulikawn Aizawl chhungte an tel.
DLSA Aizawl chairman chuan, mi pawikhawihna avanga hetiang hun hman a ngai thin chu pawi a tih thu a sawi a. Tualthah leh pawngsual chu mimal chunga thleng ni mah se, sawrkar pawikhawihna a ni tih a sawi. An sum inhlan chu chhungkua emaw mimal emaw dam khawchhuahna atan, nunphung pangngai zawh leh theihna atan tangkai taka hman chu a dawngtute tih tur a ni, tiin, chu chu sawrkar pawhin a phut a ni tih a sawi a ni.
DLSA Aizawl secretary, chief judicial magistrate Lalrochami Ralte chuan zangnadawmna pek dan kalphung a sawi a. Dawng thei nia inhria chuan District Legal Services Authority Aizawl, District Court building room 419-ah zawhfiah theih a ni tih a sawi.
Kut tuarte hnena zangnadawmna
