9th Mizoram Legislative Assembly Session vawi 5-na, a ni khatna nimin August ni 27, 2025 khan, Mizoram chhunga kutdawh khapna dan “The Mizoram Prohibition of Beggary Bill, 2025” chu sawiho a nih hnuah pawm a ni a.
Hriat theih chinah, kutdawh khapna dan (anti-begging law) nei hi state 22 an awm mek a, Mizoram hi kutdawh khapna dan nei state 23-na tur kan lo ni ta a, India rama state upat dan indawtah 23-na kan ni chiah bawk.
Hetia han ngaih mai chuan, buaipui ngai emaw, buaipui tham khawpa tam emaw ‘kutdawh’ hi Mizoramah an lo awm ve tawh a ni maw? a tih theih awm e. He Bill sawi ho a nih laia Member thenkhatin an sawi danin, Aizawl khawpuiah hian kutdawh thin (regular) chu 30 vel an awm a; Mizoram pum anga chhutin, kutdawh hi 50 vel chu an awm ve awm e, tih a ni.
Heti zat vel lek kutdawh awm si, kutdawh khapna dan legislate kher hi a la tul tehchiam em maw ni le? State pawn atanga hnam dang lo lut tur lah, a venna ILP a awm tho a, chu chu a tawk rih mai lawm ni? tih zawhna opposition lam atangin a awm a. Bill pu luttu lamin Rel lo lut thuk tur chu tlawhchhan pakhatah hmangin, a khaikhawm nan chuan, hma lam hun thui tak thlirin, dan tlawhchhan tur lo neih lawk hi a tul a ni, an ti a ni ber a.
Eng pawh ni se, Kutdawh khapna dan neih hi a sual hran lo a; kutdawh khapna dan nei kher lo pawhin kan la inenkawl (manage) thei tawk tih pawh a dik tho; kan tun dinhmunah hi chuan. Mahse, lo invenlawk hi chu kan tihtur a ni. ILP hmanga lo lut thei si, an lo luh chhan (trade) ang lova hna thawk ta daih hi an tam thin a, cement mistiri ni si, nepnawi zuara khawlaia tei kual ta mai mai pawh an awm thin nia sawi a ni.
Kutdawh khapna dan hmasa ber “Bombay Prevention of Begging Act, 1959” kha state dangin an adopt chho zel a, a tlangpuiin ‘Prohibition’ hmang lovin ‘Prevention’ an hmang thin. Uttar Pradesh, Uttarakhand leh Sikkim ten ‘Prohibition’ an hmang a, Sikkim hi kutdawh khapna dan nei hnuhnung ber a ni a, 2004 khan an nei a, Mizoramin kum 21 hnuah kan dawt chho leh chiah a, ‘Prohibition’ kan hmang ve bawk.
Kutdawh hi ‘crime’ a ni lo a, chutih laiin dan kan siam hnan erawh chuan criminal dangte anga hrem theih, lung in tan leh pawisa chawitir theih an lo ni ta a. Hei hi ngaihtuah chian chuan, Mizo hnam ziarang nen a inhmeh lo hle thei awm e. State dangin ‘prohibition’ aia ‘prevention’ an hman chhan nia ngaih theih chu, kutdawhte khalh khawm a, an chunga hremna lek lova, an dinhmun azira an dinhmun dawmkan leh khaichhuahna tur ngaihtuahsak (rehabilitate) lam a ni zawk mah awm e.
Kutdawh khapna dan leh a behbawm…
