- MNF
Kuthnathawktute ipte-a pawisa thun
hnem ber anga insawi hi awih loh tur
- MNF
Chief minister Lalduhoma’n ZPM sawrkar chu kuthnathawktute ipte-a pawisa thun hnem ber angin a insawi tih MNF chuan sawiin, he a thusawi hi belhchian dawl lo, amah ngei pawhin a awih loh tur a ni tih an sawi.
MNF Gen. Hqrs. thuchhuak chuan, MNF sawrkar liamta khan SEDP ‘pilot project’ atan kum 2019- 2020 ah vawk vulhtu chhungkaw 220 hnenah cheng nuai thum theuh, a vaiin Rs. 66,000,000 an ipte-ah a thun sak a. Ar – Broiler leh Rainbow Rooster vulhtu chhungkaw 800 hnenah Rs. 150000 theuh, a vaiin Rs. 120,000,000 a pe a. Sericulture hnuaiah chhungkaw 425 hnenah Rs 150000 theuh, a vaiin Rs. 63,750,000 kuthnathawktute ipte-ah a thunsak tih a sawi.
Hemi hnu hian Covid-19 leng vangin SEDP chhunzawm thei rih lo mah se, 2021- 2022 sawrkar kum atan SEDP hnuaiah kuthnathawktu chhungkaw 60000 tan cheng vaibelchhe 150 pek an ni a. Kum 2022- 2023 ah cheng vbch 150 pek leh niin, 2023- 2024 atana vbch.150 dah fel sa erawh MNF sawrkar khan a hmang hman ta lo tih a sawi. Chuti chungin kuthnathawkte bultanna leh an intunnunna tura tanpuina pek chu a vaiin Rs. 3,249,750,000 a ni tih a sawi bawk
‘Covid lengin kan ram economy a tihchhiat karah pawh MNF sawrkarin kuthnathawktute ipte-a pawisa a thun dan chu hetiang hi a ni a. Hetih laia Pu Lalduhoma’n cheng vbch. 90.4 sawhthing leina atan an hman hnua titha ber anga a insawi hi inngaihtuah nawn se kan duh a ni,’ a ti.
RTI zawhna Agriculture department chhan danin, ZPM sawrkar hian kum 2024-a kuthnathawktute sawhthing an chintir zat chu quintal 2,74,173 niin, thar chhuak tura a beisei zat chu quintal 14,83,256 a ni tih MNF hian sawiin, ‘Kumin June 27 thlenga an lei zat erawh quintal 2,33,604 a ni. Hei hi thar chhuak tura beisei zat atanga chhutin zaah 15.7 chauh an lei sak tihna a ni a. Sawhthing lei kawngah ZPM sawrkar a ‘fail’ chiang a, ‘pass mark’ an hmu pha lo a ni,’ a ti.