- Jeje Lalpekhlua
Kuthnathawktute thlai thar sawrkarin a lei sak avang leh thalai lehkhathiam hna zawng mekte tan dan ang taka hna lak a nih avangin an lawm tih MLA Jeje Lalpekhlua chuan a sawi.
Thawhtannia ZPM office-a inkhawmah ZPM Thalai president ni bawk Jeje Lalpekhlua chuan, eptu lam atanga minister-te hmalaknaah mipui rilru hruaikawi thei zawnga beihna awm fo chu a dik reng em, tiin ZPM Thalai-in theih ang tawka chhuichiangin document awm theite an lakhawm a, thil dik lo leh fuh tawk lo chhuichhuah an la nei lo tih a sawi.
Eptu party-ten ZPM sawrkarin sawhthing a lei theih loh tur thu hahipin an sawi a; an lei ta cheng a, sum an dawn har thu an thehdarh leh a, kuthnathawktute sawhthing thar chhuah sawrkarin a lei an thlakhlelh tluk zetin eptu party chuan sawrkarin a lei tak tak an hlau ve thung a, opposition ho chu sawhthing thar tam loh hlau ber ber an ni leh lawi si tih ZPM MLA hian a sawi.
“Kuthnathawktuten rim taka an thawh hah man han hmuhpui chuan hnuk pawh a ulh thei hial. Sawhthing neitute account-ah pawisa thun mek zel a ni a, account-a la lut fel chiah lo pawh an awm a, pawisa an khawl theih phah ve thung a ni,” Jeje Lakpekhlua hian a ti.
Thalai lehkha thiam hna hmu thei lo tam zia sawiin, thenkhat chu exam turin theihtawp an chhuah a, ti tha ve riaua an inhriat chang pawhin an tling hleithei thin lo tih a sawi. “ZPM-in sawrkarna kan chelh chinah erawh hna lak chungchangah fair takin kalpui a ni a, thalai hna zawng mekte an phur thar a ni. Kan sawrkar hnuah hna lak a tam tawh hle a, advertisement mumal taka chhuah a ni zel a. Advertisement awm mumal loa minister-ten an duhsak zawng an lo thun thin ang hmuh tur a awm tawh lo ringawt pawh hi thalai lehkhathiam leh hna zawng mekte an lawm hle a ni,” a ti.